Hăng adai pơ-iă angin amăng bơyan phang Dap Kơdư, jua măi đik đak mơak ƀơi anih man pơkra mrô 3, kơčăo bruă mrô 3 jơlan rơdêh đuăi hmar Khánh Hòa - Buôn Ma Thuột. Ayong Nguyễn Đình Lợi, mơnuih apăn bruă kĭ thuâ̆t pơ anai brơi thâo, giăm ha rơtuh čô kông ñơn hrŏm hăng 60 boh rơdêh djŏp mơta glăk gum pơkra jơlan đah mơ̆ng tañ giong:“Tui hăng tơlơi git gai mơ̆ng Khua dêh čar lĕ “găn pơ-iă blă lui hơjan”, adơi ayong mơnuih wai lăng, kĭ thuâ̆t, kông ñơn, mơnuih mơgăt rơdêh djru pơkra jơlan 3 ca 4 kíp, gir kơtir biă mă, kiăng abih bang anih pơkra hmư̆ hing ngă tui”.

Hrŏm hăng kơčăo bruă pơkra jơlan rơdêh đuăi hmar Buôn Ma Thuột hăng Khánh Hoà, hơdôm pluh čô kông ñơn hăng rơdêh glăk čuk čư̆, klơi luh, mut găn jơlan čư̆ čun čoe Phượng Hoàng. Ơi Ngô Hiểu Khoa, Khua git gai Grup bơwih ƀong Đèo Cả lăi: jơlan mut amăng čư̆ Phượng Hoàng glông 1,7km hrŏm hăng 10 ƀĕ tơdrông glông abih tih ñu 11km amra dưi ngă tañ hloh kơ hrơi pơkă: “Hăng tơlơi dưi ngă tui ră anai lĕ gơmơi pơhlôm truh rơnuč thun 2025 amra dưi pơkra giong jơlan mut amăng čư̆ Phượng Hoàng, hơdôm boh tơdrông amra dưi pơkra giong gai tŏ tơkal”.

Hrŏm hăng Kơčăo bruă jơlan rơdêh đuăi hmar Buôn Ma Thuột - Khánh Hoà (glông 117,5km) glăk man pơkra, hơdôm boh tơring čar amăng kual Dap Kơdư ăt glăk ječ ameč prăp rơmet čuk pơkra jơlan rơdêh đuăi hmar pơtruh nao rai kual. Ƀơi Dak Nông, hơdôm gơnong bruă, gong gai prăp lui laih kơ kơčăo bruă jơlan rơdêh đuăi hmar Kơdư - Dơnung gah Yŭ črăn jơlan Gia Nghĩa (Dak Nông) - CHơn Thành (Bình Phước). Ơi Hồ Văn Mười, Khua Jơnum min mơnuih ƀôn sang tơring čar Dak Nông, pơsit, jơlan rơdêh đuăi hmar Gia Nghĩa - Chơn Thành amra dưi pơkra giong djơ̆ hăng hrơi pơkă amăng thun 2027:“Sit nik thun 2025 man pơkra jơlan anai, anun lĕ tơlơi pơtrun mơ̆ng Ping gah, Kơnuk kơna kơ jơlan rơdêh đuăi hmar Gia Nghĩa - Chơn Thành. Gah tơring čar Bình Phước hơmâo pơphun pơka jơlan mơ̆ng Chơn Thành nao pơ Bình Dương laih anun pơtruh hăng ƀôn prong Hồ Chí Minh, lơ̆m jơlan rơdêh đuăi hmar Gia Nghĩa hăng Chơn Thành pơkra giong amra jing tơlơi pơplih prong biă mă kơ bruă bơwih ƀong huă mơnuih mơnam tơring čar Dak Nông”.

Gah tơring čar Lâm Đồng, gong gai tơring čar glăk ngă hrŏm hăng tơring čar Khánh Hoà hăng hơdôm anom bruă bơdjơ̆ nao ngă hră pơ-ar pơkra jơlan đuăi hmar Nha Trang - Liên Khương glông giăm 100km. Laih dong, dua glông jơlan đuăi hmar pơtruh Lâm Đồng hăng kual Ngŏ dơnung jing Tân Phú - Bảo Lộc (66km) hăng Bảo Lộc - Liên Khương (73km) ăt glăk hơmâo pơsir brơi tơlơi gun đah mơ̆ng dưi ngă sit nik. Ơi Trần Hồng Thái - Khua Jơnum min mơnuih ƀôn sang tơring čar Lâm Đồng lăi rơđah:“Jơlan glông hơdôm pă ƀu pơplih ôh samơ̆ khŏm pơplih yua hơmâo tơlơi bơdjơ̆ nao mơ̆ng anai mơ̆ng adih dong. Laih dong dua kơčăo bruă anai Lâm Đồng khut khăt ngă hră pơ-ar đah mơ̆ng dưi ngă amăng thun 2025 tañ hloh”.

Pơtrut tañ bruă pơphun ngă hơdôm jơlan glông pơtruh kual Dap Kơdư jing sa amăng hơdôm bruă yôm hơmâo bơkơtuai ƀơi mông Jơnum git gai črâo bruă kual Dap Kơdư phrâo pơphun akŏ thun 2025. Ơi Rah Lan Chung, Khua Jơnum min mơnuih ƀôn sang tơring čar Gia Lai kiăng kơnuk kơna hơmâo hơdră djru brơi prăk tañ hloh kơ hơdôm kơčăo bruă yôm phun tui Tơlơi pơtrun mrô 23 mơ̆ng Ding jum kơđi čar hăng Tơlơi pơtrun mrô 377 mơ̆ng Khua dêh čar:“Sa dua kơčăo bruă mơ̆ng ră anai Gia Lai lăp đing nao biă mă anun lĕ pơkra ming hiam tơdron rơdêh por Pleiku, man pơkra jơlan rơdêh đuăi hmar Pleiku- Qui Nhơn, jơlan đuăi hmar Kơdư - Dơnung gah Yŭ, jơlan rơdêh treng nao pơ Dap Kơdư, jơlan pơtruh kual Ayunpa (Gia Lai) hăng tơring glông Ea H’leo (Dak Lăk) laih dong tal 6 lĕ jơlan tơkuh Gia Lai hăng Phú Yên”.

Kual Dap Kơdư hơmâo lu tơlơi gêh gal kơ phun pla sui thun hăng hơdôm mơta gơnam ba glăi hơdôm klai dolar, wơ̆t hăng bruă tuai čuă ngui hai prong biă, hơmâo anih anom glai hiam, gru grua boh thâo đưm...Rơngiao kơ prăk tuh pơ alin mơ̆ng Gơnong dlông, hơdôm boh tơring kiăng pơtrut tui tơlơi hơmâo, đĭ kyar kơtang hloh đah mơ̆ng dưi đĭ kyar amăng rơwang phrâo, anun jing tơlơi kiăng mơ̆ng Khua git gai Ping gah ơi Tô Lâm amăng hrơi nao mă bruă pơ tơring čar Gia Lai phrâo anai:“Ƀing ta khŏm gir run kơtang, pơmin prong, pơjing atur blung a amăng thun 2025 mơtăm đah mơ̆ng kjăp tơkai mut amăng rơnuk đĭ kyar phrâo, pơsit hơdră đĭ kyar kơ rơwang bruă phrâo, lăng nao truh pơ thun 2045 lŏn ia ta hiư̆m pă, plơi pla ta hiư̆m pă? Ƀing ta khŏm gir pơđĭ kyar Gia Lai, Dap Kơdư pơdrong sah kơ bruă ngă hmua hơdjă, anih anom glai klô hiam, gru grua hiam, hơđong kjăp mơnuih mơnam, anih dŏ, ayuh hyiăng, pơtrut đĭ kyar tañ ƀiă hăng pơđĭ tui tơlơi hơdip mơnuih ƀôn sang”.

Thun 2024, rơnoh đĭ kyar bơwih ƀong aka ƀu djơ̆ hăng tơlơi ƀing ta kiăng lơi, samơ̆ mrô GRDP mơ̆ng Dap Kơdư hơmâo rơbêh 484 rơbâo klai, GRDP yap tui akŏ mơnuih hơmalao 78,5 klăk, đĭ 16% pơhmu hăng thun 2023. Thun 2025 anai, lơ̆m lu kơčăo bruă jơlan đuăi hmar hơmâo ngă, jing phun atur kiăng Dap Kơdư kơtưn đĭ, pơplih kơtang hloh amăng bruă bơwih ƀong huă mơnuih mơnam, kjăp tơkai mut amăng rơwang phrâo./.