VOV4.Jarai - Mơguah lơ 31/1, ƀơi Hà Nội pơphun jơnum abih bang Jơnum khul bơwih ƀong sĭ mơdrô hlăk ai Việt Nam tal 7, rơwang thun 2022-2025 hăng anăn “Ba jơlan pơplih phrâo - Pơjing rơnoh yôm”. Khul bơwih ƀong sĭ mơdrô  hlăk ai Việt Nam ƀơi 63 boh tơring čar, ƀôn prong, hăng 11 rơbâo ding kơna. Hơdôm anom bơwih ƀong  sĭ mơdrô amăng Khul glăk pơjing rai lu bruă mă kơ 3 klăk čô mơnuih mă bruă hăng abih tih prăk pơhrui rĭm thun lĕ rơbêh 30 klai đôlar Mi. Jơnum pơčrông sai hơmâo ruah 153 čô ding kơna mut hrŏm amăng Jơnum min gơnong glông Khul bơwih ƀong sĭ mơdrô hlăk ai Việt Nam tal 7.

Khua mua Khul bơwih ƀong sĭ mơdrô hlăk ai Việt Nam git gai mông jơnum

Nao jơnum hăng đĭ pơhiăp git gai mông Jơnum, Kơ-iăng khua dêh čar ơi Lê Minh Khái pơpŭ bơni hơdôm tơlơi truh kih, pơgôp yôm phăn amăng ƀing mơnuih bơwih ƀong sĭ mơdrô hlăk ai hăng Khul bơwih ƀong sĭ mơdrô hlăk ai Việt Nam amăng rơwang thun mă bruă laih rơgao. Rơwang pơ anăp anai, Khul bơwih ƀong sĭ mơdrô hlăk ai Việt Nam kiăng jing sa boh sang, tum pơƀut, gum pơgôp mơng ƀing hlăk ai, pơhlôm brơi tơlơi dưi sit nik, djơ̆ tơlơi phiăn mơng ƀing bơwih ƀong sĭ mơdrô hlăk ai. Hơmâo lu mơta dong amăng bruă mă, kơtưn pơlir hơbit, pơđĭ kyar anih anom sĭ mơdrô, pơlăi nao rai tơlơi pơhing, klă dong amăng bruă mă mơng ding kơna.

Siu Đoan: Pơblang