VOV4.Jarai - Čơtlăm lơ 6/3, ƀơi ƀôn prong Đà Nẵng, pơphun Jơnum Khul pơ ala mơnuih ƀôn sang hơdôm bôh tơring čar, ƀôn prong kual Dơnung Tŏng Krah hăng kual Dăp Kơdư tal sa, rơwang bruă mơng thun 2021-2026. Ƀing khua pơ ala hmư̆ tơlơi lăi pơthâo glăi mơng Khul pơ ala mơnuih ƀôn sang hơdôm bôh tơring čar, ƀôn prong ngă rơđah 3 mơta tơlơi. Sa lĕ “Tơlơi găn rơgao amăng bruă pơđĭ tui anô̆ kơjăp, tŭ yua mông jơnum Khul pơ ala mơnuih ƀôn sang gưl tơring čar kơ hơdôm tơlơi pơblang mơng hơdôm bôh ƀirô, khul grŭp, mơnuih tui Phiăn pơphun bruă gong gai tơring čar”. Tơlơi tal 2 lĕ “Bruă pơplih phrâo jơlan gah, pơđĭ tui anô̆ kơjăp bruă lăng tui, pel ĕp tơlơi lăi pơthâo glăi, akô̆ bruă, hră čih tơlơi pơtrun pơsit lăi pơthâo glăi amăng tal jơnum”. Tơlơi tal 3 lĕ “Tơlơi găn rơgao, jơlan pơđĭ tui anô̆ kơjăp, tŭ yua bruă lăng tui, pel ĕp glăi mơng hơdôm grŭp gah Khul pơ ala mơnuih ƀôn sang”. Pơhiăp klah čun mông Jơnum, Kơ-iăng Khua git gai wai lăng pơ ala mơnuih ƀôn sang dêh čar, ơi Trần Thanh Mẫn rơkâo Khul pơ ala mơnuih ƀôn sang hơdôm bôh tơring čar, ƀôn prong ngă tui dong pran jua “gơgrong hlâo, pơčeh phrâo hăng pơplih tañ” amăng bruă mă, bruă jao; lăng tui hơdôm pơplih phrâo mơng Khua pơ ala mơnuih ƀôn sang kiăng dưi mă yua, gum hrom hăng rim tơring čar, ƀôn prong./.

Siu H’ Prăk: Pơblang