VOV4.Jarai - Mơguah lơ 17/2, ƀơi plơi prong Gia Nghĩa, tơring čar Dak Nông, Kông ti Tân Cảng Sài Gòn pơphun jơnum klah čun bruă pơtô pơblang kơ ia rơsĭ, bul pơtâo ia rơsĭ. Nao pơhmư̆ hơmâo khua mua pơ ala Ping gah tơring čar, Anom pơtô bruă Ping gah 6 boh tơring čar: Dak Nông, Gia Lai, Kon Tum, Thanh Hoá, Bình Dương, Hậu Giang; ƀing khua mơng Anom bruă kơđi čar Tơhan ia rơsĭ; Khua mua Grup kông ti Tân Cảng Sài Gòn; Anom bruă Kơđi car Kông ti, Hải đoàn 127, Hải đoàn 129. Thun 2021, ƀing čih hră lăi pơthâo bruă mă mơng Kông ti Tân Cảng Sài Gòn hơmâo nao pơ hơdôm anom bruă, tơring čar pơphun 12 wơ̆t pơtô pơblang kơ ia rơsĭ, bul ia rơsĭ, ngă pơhưč mơnuih mă bruă kơ 3.200 čô khua, mơnuih ping gah, mơnuih ƀon sang, čơđai sang hră hăng hơdôm wơ̆t rơbâo čô mơnuih bơwih ƀong mơng ia rơsĭ. Bruă pơtô pơblang thâo hluh kơ ia rơsĭ, bul ia rơsĭ mơng kông ti Tân Cảng hăng 6 boh tơring čar hơmâo lu tơlơi pơplih klă, lăi pơthâo tañ đah mơng pơđĭ tui tơlơi thâo hluh, tơlơi gơgrong bruă, hơmâo abih bang mơnuih tŭ ư hrŏm hăng bruă pơgang ba ia rơsĭ dêh čar ta.

Siu H’Mai: Pơblang