VOV4.Jarai - Mơguah lơ 12/8, Ding jum pơtô pơhrăm dêh čar ta pơphun Jơnum klah čun thun hrăm 2021-2022, pok pơhai bruă mă thun hrăm 2022-2023. Jơnum dưi pơphun tui hơdră ƀơi anăp ƀơi Hà Nội hăng lăng nao rai mơng ataih, hăng 64 bôh anih tô nao rai amăng đơ đam dêh čar. Thun hrăm 2021-2022, klin Covid-19 gluh glăi hăng ngă tơnap, Gơnong bruă pơtô pơhrăm hmâo gơgrong hlâo pơplih bruă pơtô pơhrăm, pơphun pơtô lăng nao rai mơng ataih hăng ƀơi anăp, pơhlôm ngă giong bruă mă thun hrăm. Gơnong bruă pơtô pơhrăm pơphun truh kih Tal pơplông mă ƀăng gưl 3 thun 2022 amăng sa tal pơhlôm tơpă hăng hơđong. Anai ăt lĕ thun blung a čơđai glăk hrăm anih 12 ngă hră pơplông mă ƀăng gưl 3 tui hơdră lăng nao rai mơng ataih tui glông jơlan wai lăng pơplông. Amăng mông jơnum, hrom hăng tơlơi pơsit kơ hơdôm bôh tơhnal dưi ngă, hơdôm tơlơi akă dưi ngă, akă gal, tơlơi kiăng lăng glăi amăng thun hrăm phrâo rơgao, ƀing khua pơ ala amra črông lô kơ 12 jơlan gah hăng bruă mă phun amăng thun hrăm phrâo 2022-2023 pơ̆ anăp./.

Siu H’ Prăk: Pơblang