VOV4.Jarai - Tlam lơ 30/3, ƀơi Hà Nội pơphun jơnum kơ bruă gum hrŏm kơplah wah Khua mir sir hăng Jơnum min apăn bruă Khua pơ ala mơnuih ƀon sang dêh čar. Jơnum anai pơsit lăng glăi bruă mă thun blan laih rơgao, biă mă ñu rơwang mă bruă mă bruă mơng Khua pơ ala mơnuih ƀon sang dêh čar tal XIII, XIV hăng rơwang blung a mơng thun mă bruă mơng Khua pơ ala mơnuih ƀon sang dêh čar tal XV truh ră anai, tơlơi rô nao rai gum hrŏm kơplah wah Khua mir sir hăng Ƀirô Khua pơ ala mơnuih ƀon sang dêh čar, Jơnum min apăn bruă Khua pơ ala mơnuih ƀon sang dêh čar lêng kơtưn, jai hrơi sit nik hăng ba glăi tŭ yua prong prin, djop mơta amăng bruă mă.

Khua mir sir ơi Nguyễn Xuân Phúc đĭ pơhiăp amăng mông Jơnum

Kơ bruă mă pơ anăp anai, Khua mir sir ơi Nguyễn Xuân Phúc lăi glăi tơlơi git gai mơng Khua git gai Ping gah dêh čar ơi Nguyễn Phú Trọng amăng jơnum lok blung a, Khua pơ ala mơnuih ƀon sang dêh čar tal XV; amăng anun rơkâo Khua pơ ala mơnuih ƀon sang dêh čar kiăng tŏ ngă tui pran kơtang mơng tơlơi gơgrong mơng ƀing gơñu amăng bruă čih pơkra phiah phiăn amăng djop mơta bruă mă amăng lŏn ia, bruă jao pơđĭ kyar bơwih ƀong huă mơnuih mơnam, pơhlôm hơđong rơnuk rơnua, pơtom hiăp.

Siu Đoan: Pơblang