VOV4.Jarai - Mơguah lơ 28/3, ƀơi tơring čar Quảng Ninh, Khul apăn bruă Tơlơi thâo rơgơi Ping gah dêh čar, Anom bruă dăp Hră pơhing Cộng sản hăng Ping gah tơring čar Quảng Ninh ngă hrŏm pơphun Jơnum boh thâo gưl dêh čar “Prăk kăk dram gơnam hăng tơlơi gêh gal djru rŭ glăi hăng pơđĭ kyar bơwih ƀong huă mơnuih mơnam amăng hrơi mông hơdip hrŏm rơnuk rơnua, hơdeč hmar, pơgang klă klin Covid-19 - Tơlơi pơmin lăng nao pơ anăp gưl dêh čar hăng bruă mă ƀơi tơring čar”. Pơhiăp ƀơi mông jơnum, ơi Nguyễn Xuân Thắng, Khua khul apăn bruă Tơlơi thâo rơgơi Ping gah dêh čar hơmâo ba pơƀuh hơdră phrâo amăng bruă iâu pơthưr, mă yua klă djŏp tơlơi hơmâo, pơsit tơlơi gêh gal, tơlơi pơtrut đĭ phrâo kơ bruă rŭ glăi hăng pơđĭ kyar bơwih ƀong huă - mơnuih mơnam.

Mông jơnum

Ƀing khua hơmâo pơblang kơ bruă ngă brơi amuñ hơdôm tơlơi dưi đĭ kyar kah hăng prăk kăk, lŏn tơnah, mơnuih mă bruă; tơlơi phiăn pơđĭ kyar boh thâo ia rơgơi, măi mok hăng pơčeh phrâo; hơdră mă yua prăk kăk, mơnuih mă bruă; pơhlôm djru ba tơlơi hơdip mơnuih ƀon sang; kông ngăn boh thâo gru grua; tơlơi rơgơi hla tui boh thâo hăng pơtrut tui tơlơi rô nao rai hơdôm tơlơi bơwih ƀong; rŭ glăi bruă tuai hyu ngui; pơđĭ tui boh tŭ yua wai lăng amăng plơi pla, pơtrut tui dram gơnam, mơnuih mă bruă, pran kơtang mơng anom bruă gah rơngiao kơnuk kơna.

Siu H’Mai: Pơblang