VOV4.Jarai - Amăng lơ 8/4, ƀơi plơi prong Pleiku, Ding jum ngă hmua hăng pơđĭ kyar ƀon lan gum hrŏm hăng Jơnum min mơnuih ƀon sang tơring čar Gia Lai pơphun jơnum lăng glăi tơlơi tơnap hăng hơdră pơđĭ kyar mơng pla plum ƀơi dêh čar Việt Nam. Ră anai, dêh čar ta hơmâo rơbêh 528.000 ektar hmua pla plum, pla lu hloh lĕ ƀơi kual Ngŏ Dơnung. Thun 2021, pơhrui đơ đam dêh čar giăm 10 klăk 700 rơbâo tơ̆n, amăng anun hơmâo 2 klăk 900 rơbâo tơ̆n ba sĭ mơdrô pơ tač rơngiao, rơnoh prăk pơhrui giăm 1 klai 200 klăk đôlar Mi.

Amăng mông jơnum, Kơ-iăng khua ding jum ngă hmua hăng pơđĭ kyar ƀon lan ơi Lê Quốc Doanh brơi thâo, pơ anăp anai, hơdôm anom bruă amăng Ding jum ngă hmua hăng pơđĭ kyar ƀon lan amra kơtưn kơsem min hơdôm pơjeh plum dưi pơhrui glăi hmâo hmăi hăng pơgang kman kơtang. Kơ-iăng khua ding jum rơkâo djop ƀon lan hăng anom bơwih ƀong sĭ mơdrô pơphun pla pơjing tui hăng hơdră plai ƀiă prăk tuh pơ alin, đĭ tui rơnoh pơhrui; pơplih boh thâo pla pơjing, pơtrut pơkra pơjing klă ƀiă dong, pơhlôm pơgang ayuh hyiăng hăng pơlir bơwih ƀong hơđong kjăp.

Siu Đoan: Pơblang