VOV4.Jarai-Lơ 27/4, ƀơi Hà Nội, Ding jum ling tơhan pơphun jơnum lăng nao rai amăng tivi đơ đam dêh čar pơtô tơlơi phiăn pơgang guai dêh čar Việt Nam hăng hơdôm hră pơtrun tơlơi phiăn pơtrun pơkŏn tum teč hloh. Tơlơi phiăn pơgang guai dêh čar Việt Nam dưi hơmâo khua mua pơ ala mơnuih ƀôn sang dêh čar pơsit lơ 11/11/2020, dưi ngă tui mơtam mơ̆ng lơ 1/1/2022. Ƀơi mông jơnum, ƀing khua mua pơtô tong ten lu boh yôm phun amăng hơdrôm hră tơlơi phiăn pơgang guai dêh čar Việt Nam hăng hơdôm hră pơar pơtô brơi ngă tui tơlơi phiăn.

Tui hăng tơlơi phiăn Pơgang guai dêh čar Việt Nam pơkă djop, lu mơta, rơđah rơđong pơgang tơlơi dưi lŏn ia, pơgang guai dêh čar. Biă mă ñu pơkă tong ten rơđah rơđong bruă mă djop gưl anom bruă, djop sang bruă, ling tơhan blah ngă hăng djop sang bruă kơđi čar amăng bruă man pơdong, wai lăng, pơgang guai dêh čar. Tơlơi phiăn ăt pơtong rơđah Ling tơhan pơgang guai dêh čar lĕ sa amăng hơdôm anom bruă tơhan pơgang tơlơi rơnuk rơnua lŏn ia amăng kual guai lŏn ia, dưi ngă tui lu hơdră pơgang rơnuk rơnua dêh čar tui tơlơi phiăn pơtrun.

Nay Jek: Pơblang