VOV4.Jarai - Hrơi anai (30/5), Jơnum lok 3, Khua git gai pơ ala mơnuih ƀon sang dêh čar tal 15 yak nao rơwang ngă bruă tal 2. Tui hăng jơlan hơdră ngă bruă, mơguah hrơi anai, Khua mua git gai pơ ala mơnuih ƀon sang pơhmư̆ tơlơi lăi pơthâo mơng Khul khua wai lăng hăng bơkơtuai ƀơi sang jơnum kơ bruă ngă tui tơlơi phiăn amăng bruă dưm dăp pơkă hơnong dong mơng Tơlơi phiăn dưm dăp pơkă hơnong dưi mă yua. Anai jing bruă yôm phun, yua dah tơdah dưm dăp hlâo, pơhlôm djơ̆ hrơi pơkă, anŏ klă amra pơtrut đĭ kyar bơwih ƀong huă - mơnuih mơnam mơng lŏn ia ta.

Rơngiao kơ mông bơkơtuai hrơi anai, amăng rơwang hrơi tơjuh anai Khua mua pơ ala mơnuih ƀon sang dêh čar hơmâo pioh 2 hrơi ngă bruă hơmâo pôr pơthâo hăng pơdah rup ƀơi anăp. Anun lĕ lơ 1 hăng lơ 2/6, bơkơtuai pơtŏng glăi bruă ngă tui pơđĭ kyar bơwih ƀong huă - mơnuih mơnam laih anun prăk kơnuk kơna thun 2021; bruă ngă tui kơčăo bruă pơđĭ kyar bơwih ƀong huă - mơnuih mơnam hăng prăk kơnuk kơna hơdôm blan akŏ thun 2022; bruă ngă tui Tơlơi pơtrun mrô 42 thun 2017 kơ bruă pơsir hĭ hnưh dong ƀu anăm tla mơng hơdôm anom bruă brơi čan hăng bruă pơhrơ̆i sui hrơi pơkă mă yua abih bang tơlơi pơkă mơng Tơlơi pơtrun anai.

Siu H’Mai: Pơblang