VOV4.Jarai-Lơ 13/6, pơphun mă bruă rơwang hrơi tơjuh tal rơnuč jơnum lok 3, khua mua pơ ala mơnuih ƀôn sang dêh čar tal XV. Amăng rơwang hrơi tơjuh anai, ƀing pơ ala mơnuih ƀôn sang dêh čar pioh lu mông pơčrông sai, pơgôp hiăp hơdôm kơčăo bruă tơlơi phiăn kah hăng: Tơlơi phiăn pơkă lăng, pơjrao duăm ruă čih pơkra glăi; Tơlơi phiăn sem glăi bruă mă; Tơlơi phiăn ngă tui tơlơi dưi pô djop mơnuih; Tơlơi phiăn pơhlôm, pơgăn taih amang amăng sang anŏ čih pơkra glăi; Tơlơi phiăn bruă Ia jâo; Tơlơi phiăn pơkă mrô pơyiong rajio.

Ƀing khua mua pơ ala amra plĕ hră pơsit hơdôm tơlơi phiăn anai hăng hơdrôm hră pơtrun mơ̆ng Khua git gai pơ ala mơnuih ƀôn sang dêh čar. Hơdôm tơlơi phiăn amra plĕ hră pơsit hĭ kah hăng Tơlơi phiăn Tơhan pơlih blah ngă; Tơlơi phiăn Phim silma; Tơlơi phiăn  pơplông apah bơni; Tơlơi phiăn pơhrua nao dơ̆ng hơdôm mơta tơlơi pơgang ngă pô ia rơgơi tơlơi kơhnâo pơčeh rai; Tơlơi phiăn sĭ mơdrô hră pơhlôm nua čih pơkra glăi.

Nay Jek: Pơblang