Amăng tal 2 anai, Khua pơ ala mơnuih ƀon sang dêh čar jơnum na nao mơng lơ 19 truh abih lơ 24/6. Ƀing khua mua tŏ tui pơčrông sai kơ 10 črăn tơlơi phiăn, sem lăng tŭ yap 8 tơlơi phiăn, 11 tơlơi pơtrun. Amăng mơguah lơ 19/6, pơgôp hiăp amăng črăn tơlơi phiăn sang dŏ (čih pơkra glăi), ƀing khua mua rơkâo hơmâo tơlơi pơkă kơ thun blan yua sang dŏ tui thun blan pơkă mă yua sang dŏ. Tơlơi pơkă anun amra ba glăi tŭ yua kơ mơnuih yua sang dŏ hăng mơnuih mơnam…

Bruă pơđĭ kyar sang dŏ mơnuih mơnam tui hơdră brơi yua apah ăt hơmâo lu khua mua pơčrông kiăng hơmâo hơdră klă hloh brơi hơdră sang dŏ mơnuih mơnam. Ƀing khua mua lăng yôm črăn tơlơi phiăn anăp nao pơsir hĭ hơdôm anŏ aka ƀu klă amăng pơđĭ kyar sang dŏ, tuh pơ alin, sang dŏ mơnuih mơnam, wai lăng sang dŏ. Tui ơi Nguyễn Văn Hiển, khua pơ ala mơnuih ƀon sang tơring čar Lâm Đồng, kiăng đing nao hơdôm hơnong pơkă phun amăng pơđĭ kyar sang dŏ mơnuih mơnam, djơ̆ hăng tơlơi kiăng anih dŏ lăp djơ̆  hăng mơnuih ƀon sang, ƀu djơ̆ tui hăng tơlơi kiăng blơi dŏ hlao.