Jơnum anai pơtong glăi, jơnum lok 7, khua mua pơ ala mơnuih ƀôn sang dêh čar tal XV tŭ yua hiam klă, ngă giong hơdôm bruă pơsir pơprong amăng klâo kơčăo bruă phun čih pơkra tơlơi phiăn dêh čar, krăo lăng hăng pơsit lu bruă yôm kơ dêh čar, ăt pơblih phrâo, ngă djop bruă kiăng klă hloh tui tơlơi hơmâo sit nik. Tui hăng tơlơi him lăng, jơnum lok 8 pơphun mơ̆ng lơ 21/10 hăng pơđut jơnum amăng lơ 28/11. Ƀơi mông jơnum lok anai, him lăng khua mua pơ ala mơnuih ƀôn sang dêh čar sem glăi, pơsit 11 mơta tơlơi phiăn dêh čar; pơgôp hiăp kơ 12 kơčăo bruă tơlơi phiăn; sem lăng hơdôm tơlơi bơwih ƀong huă mơnuih mơnam, jŭ yap prăk kơnuk kơna, krăo lăng, pơphun tơña ƀing ding kơna kơnuk kơna dêh čar hăng lu bruă yôm pơkŏn.

Ơi Trần Thanh Mẫn, Khua git gai pơ ala mơnuih ƀôn sang dêh čar lăi lĕ, mrô bruă yôm phun čih tơlơi phiăn, krăo lăng, pơsit hơdôm bruă yôm kơ dêh čar  jơnum lok 8 pơ anăp prong hăng lu biă mă, laih dơ̆ng bruă mă tơnap hloh anun yơh kiăng pơphun jơnum lok 8 amăng dua wơ̆t pơtum, pioh kơ djop sang bruă gah anom bruă pơ ala mơnuih ƀôn sang dêh čar thâo, čih pioh, pơblang brơi hơdôm tơlơi pơgôp hiăp mơ̆ng ƀing pơ ala tŭ yua hloh hlâo kơ pơdah thâo amăng mông jơnum abih bang ƀing pơ ala.