VOV4.Jarai  - Mơguah lơ (10/3), ƀơi Ƀirô Khua pơ ala mơnuih ƀon sang dêh čar, pơphun jơnum lok 9 mơng Jơnum min apăn bruă Khua pơ ala mơnuih ƀon sang dêh čar. Amăng tal jơnum anai amra pơpha jing 2 wŏt, hăng abih tih hrơi mông mă bruă lĕ 8 hrơi. Tal 1 jơnum pơphun mơng hrơi anai truh lơ 17/3. Sit biă ñu, jơnum anai, Jơnum min apăn bruă Khua pơ ala mơnuih ƀon sang dêh čar hơmâo pioh 1 hrơi mă bruă kiăng kơ tơña hăng lăi glăi tơña mơng 2 čô khua mua ding kơna Kơnuk kơna. Khua ding jum sĭ mơdrô hăng tuh tia pơkra pơjing Nguyễn Hồng Diên hăng Khua ding jum wai lăng rơhuông adai lŏn mơnai Trần Hồng Hà amra lăi glăi tơlơi tơña amăng jơnum hrơi blung a mơng Jơnum min apăn bruă Khua pơ ala mơnuih ƀon sang dêh čar tal XV. Boh tơhnal arăng tơña hăng Khua ding jum Nguyễn Hồng Diên đing nao bruă pơkra pơjing, sĭ mơdrô ia jâu; bruă wai lăng nua sĭ mơdrô ia săng, ia jâu amăng thun blan laih rơgao. Boh tơhnal arăng tơña Khua ding jum Trần Hồng Hà đing nao bruă ngă tui tơlơi pơtrun amăng tơña hăng lăi glăi tơlơi tơña hăng bruă krăo lăng bruă mă mơng Khua pơ ala mơnuih ƀon sang dêh čar bơdjơ̆ nao hơdôm akŏ bruă man pơdong, wai lăng, mă yua lŏn mơnai amăng plơi prong. Mông tơña hăng lăi glăi tơlơi tơña him lăng pơphun amăng lơ 16/3 ƀơi sang jơnum Diên Hồng, Ƀrô Khua pơ ala mơnuih ƀon sang dêh čar hăng pơdah lăng nao rai amăng tivi hăng 63 khul khua mua pơ ala mơnuih ƀon sang ƀơi hơdôm tơring čar, ƀôn prong hăng mông jơnum pơdah brơi abih bang mơnuih ƀon sang sem lăng.

Siu Đoan: Pơblang