VOV4.Jarai-Ăt amăng hơdră mă bruă amăng tal jơnum lok 10, mơguah hrơi anai, lơ 25/4, Jơnum min apăn bruă git gai pơ ala mơnuih ƀôn sang dêh čar pơgôp hiăp lăi pơthâo kơ hră lăi pơthâo mơ̆ng kơnuk kơna kơ boh tơhnal ngă tui pơkrem prăk, pơgăn phăk phai thun 2021. Amăng bruă mă prăp lui tuh pơ alin, dŏ hơmâo lu kơčăo bruă aka ƀu djop hră pơar, aka ƀu djop anŏ gêh găl pơpha prăk tuh pơ alin, anun ngă kơ lu bruă ngă aka ƀu hmao hang hrơi blan pơkă blung a; bruă jŭ yap glăi, pơblih pơpha, pơhrua rơnoh prăk kơ hơdôm kơčăo bruă klă laih, hơmâo prăk kiăng ngă pơgiong bruă, hơdôm kơčăo bruă aka ƀu hmao mơ̆ng hlâo, brơi pơsir hmar. Anai lĕ tơlơi dŏ kơƀah amăng lu thun rơgao, kơnuk kơna kiăng pơsir mơtam khut khăt.

Amăng thun 2021, 9 boh ding jum hăng 21 boh tơring čar ăt aka ƀu pơpha rơnoh prăk tuh pơ alin kơ bruă čar; hơmâo 10 boh tơring čar aka pơpha abih rơnoh prăk jao. Mơnuih ruah khua amăng dêh čar čang rơmang hơdôm tơlơi dŏ gun amăng tơlơi phiăn pơkrem prăk, pơgăn phăk phai khom bơkơtuai tong ten djơ̆ hơdră amăng mông jơnum khua mua apăn bruă Jơnum min git gai pơ ala mơnuih ƀôn sang dêh čar hrơi anai mơtam.

Nay Jek: Pơblang