VOV4.Jarai - Khua git gai pơ ala mơnuih ƀon sang dêh čar ơi Vương Đình Huệ hơmâo kĭ Tơlơi pơtrun mrô 17 thun 2022 mơng Jơnum min apăn bruă git gai pơ ala mơnuih ƀon sang tal 15 kơ mông ngă bruă t  him amăng 1 thun, amăng 1 blan mơng mơnuih mă bruă amăng hrơi blan glăk pơgang klin Covid-19 hăng rŭ glăi tơlơi bơwih ƀong, pơđĭ kyar bơwih ƀong huă - mơnuih mơnam. Jơnum min apăn bruă git gai pơ ala mơnuih ƀon sang pơsit tơdah pô yua mơnuih mă bruă kiăng laih anun pô mă bruă tŭ ư mơn lĕ dưi brơi mơnuih mă bruă mă thim rơbêh 200 mông samơ̆ ƀu rơgao 300 mông amăng 1 thun. Kơ mrô mông ngă bruă thim amăng 1 blan, tơdah pô apah mơnuih mă bruă dưi iâu mơnuih mă bruă ngă thim abih 300 mông mơtăm amăng 1 thun tui hăng tơlơi kiăng laih anun hơmâo pô mă bruă tŭ ư lĕ dưi brơi arăng mă bruă thim rơbêh 40 mông samơ̆ ƀu dưi rơgao 60 mông ôh lơ̆m sa blan. Bruă ngă tui tơlơi pơtrun mông ngă bruă thim ƀơi tơlơi pơtrun anai khŏm kiăo tui tơlơi phiăn pơkŏn bơdjơ̆ nao mơng Tơlơi phiăn Mă bruă. Tơlơi pơtrun anai dưi mă yua mơng lơ 1 blan 4 thun 2022.

Siu H’Mai: Pơblang