VOV4.Jarai - Tô̆ tui jơlan hơdră jơnum lok 11, lơ 13/5, Jơnum min apăn bruă Khua pơ ala mơnuih ƀôn sang dêh čar pel ĕp bruă pơkă hlâo jơlan gah pơpha ngăn drăp dêh čar rơwang 2021-2025 hăng thun 2022 kơ hơdôm ding jum, ƀirô dêh čar hăng tơring čar, ƀôn prong ngă tui 3 jơlan hơdră pơkă mơng lŏn ia; pel ĕp bruă pơhrua nao kơčăo bruă ngăn drăp kơnuk kơna. Kiăo tui anun, Jơnum min apăn bruă Khua pơ ala mơnuih ƀôn sang dêh čar ăt gum pơhiăp mơn kơ bruă lăi pơthâo Khua pơ ala mơnuih ƀôn sang pel ĕp, pơsit hơdră pơtrun tuh pơ plai tal sa hơdôm rơwang bruă pơdŏng pơkra jơlan nao rai đuăi hmar Châu Đốc – Cần Thơ – Sóc Trăng; Khánh Hòa – Buôn Ma Thuột; Biên Hòa – Vũng Tàu. Anai lĕ hơdôm rơwang bruă yôm phăn mơng lŏn ia gah tơlơi dưi mơng Khua pơ ala mơnuih ƀôn sang dêh čar dưi pơsit hơdră pơtrun tuh pơplai, hmâo mă yua lu mơta ngăn drăp dêh čar, tơring čar, ƀôn prong, prăk tuh pơplai bruă hrom hăng prăk gah pơsur pơtrut bơwih ƀong./.

Siu H’ Prăk: Pơblang