VOV4.Jarai - Mông jơnum lok 11 mơng Jơnum min apăn bruă Khua pơ ala mơnuih ƀôn sang dêh čar ta pơkă hlâo pơphun mơng hrơi pơgi, lơ 11 truh lơ 20/5 amra gum pơhiăp kơ lu bôh yôm phăn. Anun lĕ pel ĕp, pơsit bruă pơdŏng tơring kual Phương Sơn gah tơring glông Lục Nam hăng pơdŏng tơring kual Bắc Lý gah tơring glông Hiệp Hoà, tơring čar Bắc Giang; hơdră pơtrun pơplih bôh than mă yua dlai, lŏn dlai hăng lŏn ngă hmua pơdai mơng dua bơyan hăng lu hloh mơng Rơwang bruă pơdŏng ring bruă jơlan đuăi hmar mơng Pơngŏ nao gah Dơnung gah Ngŏ rơwang mơng thun 2021-2025 (tơdah djop tơlơi pơkă).

Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ tơlơi lăi pơthâo glăi pơsit pơhrua nao klah čun bôh tơhnal ngă tui pơđĭ kyar bơwih ƀong – mơnuih mơnam hăng ngăn drăp kơnuk kơna thun 2021; tơlơi pok pơhai ngă tui kơčăo bruă pơđĭ kyar bơwih ƀong – mơnuih mơnam hăng ngăn drăp kơnuk kơna hơdôm blan akô̆ thun 2022; Pel ĕp bruă pơkă lăng hlâo jơlan gah pơpha ngăn drăp kơnuk kơna rơwang 2021-2025 hăng thun 2022 kơ hơdôm ding jum, ƀirô kơnuk kơna hăng tơring čar, ƀôn prong ngă tui 3 jơlan hơdră pơkă mơng dêh čar; pơhrua nao kơčăo bruă ngăn drăp kơnuk kơna thun 2022 amăng dêh čar pơpha kơ hơdôm ding jum, gơnong bruă, tơring čar, ƀôn prong./.

Siu H’ Prăk: Pơblang