VOV4.Jarai - Tlam tom brơi (15/9), pơgôp hiăp kơ bruă prap lui jơnum lok 4, Khua pơ ala mơnuih ƀon sang dêh čar tal 15, Khua čih pioh Ƀirô Khua pơ ala mơnuih ƀon sang dêh čar, Khua anom bruă Khua pơ ala mơnuih ƀon sang dêh čar ơi Bùi Văn Cường brơi thâo, him lăng hrơi mông mă bruă amăng jơnum lok 4 lĕ 23 hrơi ha mơkrah. Jơnum Khua pơ ala mơnuih ƀon sang dêh čar him lăng pơphun amăng lơ 20/10. Khua čih pioh Ƀirô Khua pơ ala mơnuih ƀon sang dêh čar ơi Bùi Văn Cường brơi thâo, Kơnuk kơna rơkâo pơhrua boh tơhnal mơ-it Khua pơ ala mơnuih ƀon sang dêh čar sem lăng, pơsit akŏ bruă abih bang rơwang thun 2021-2030, anăp nao truh thun 2050; mơ-it Khua pơ ala mơnuih ƀon sang dêh čar sem lăng, tŭ yap tơlơi pơtrun ngă tui lông lăng kơ bruă ruah mrô rơdêh ôtô hluai tui bruă bơkơtưn hăng sem lăng, tŭ yap tơlơi pơtrun ngă tui lông lăng sa, dua hơdră bruă akŏ phun amăng pơđĭ kyar plơi prong Buôn Ma Thuột, tơring čar Dak Lak hăng sem lăng pơsir hĭ hơdôm tơlơi gun găn, aka ƀu klă ƀơi sa, dua anih duh prăk BOT.

Tơdơi anun Jơnum min apăn bruă Khua pơ ala mơnuih ƀon sang dêh čar hơmâo pơđut hĭ jơnum tal 15, đĭ pơhiăp amăng mông pơđut jơnum, Khua pơ ala mơnuih ƀon sang dêh čar ơi Vương Đình Huệ rơkâo hơdôm anom bruă tŏ tui pơgiong hră lăi pơthâo krăo lăng bruă mă, sit biă ñu hră lăi pơthâo boh than krăp lăng “Bruă ngă tui hơdră bruă, tơlơi phiăn amăng pơkrem, pơgăn yua khưi khai rơwang thun 2016-2021” kiăng mơ-it nao Khua pơ ala mơnuih ƀon sang dêh čar amăng jơnum lok 4, tal 15.

Siu Đoan: Pơblang