VOV4.Jarai - Tŏ tui hrơi mông jơnum tal 15, mơguah lơ 15/9, Jơnum min apăn bruă Khua pơ ala mơnuih ƀon sang dêh čar pơgôp hiăp kơ bruă prap lui jơnum lok 4, Khua pơ ala mơnuih ƀon sang dêh čar tal 15. Tui hăng tơlơi rơkâo, jơnum lok 4, Khua pơ ala mơnuih ƀon sang dêh čar amra gơgrong mă bruă amăng 22 hrơi; jơnum prap lui hăng pơphun amăng lơ 20/10. Jơnum him lăng tŭ yap 6 črăn tơlơi phăn, 1 črăn tơlơi pơtrun hăng pơgôp hiăp amăng 7 črăn tơlơi phăn. Khua pơ ala mơnuih ƀon sang dêh čar hmư̆ arăng lăi pơthâo hăng pơčrông sai kơ: Boh than ngă tui akŏ bruă pơđĭ kyar bơwih ƀong huă-mơnuih mơnam hăng rơnoh pơhrui ngăn drăp kơnuk kơna thun 2022; pơsit akŏ bruă pơđĭ kyar-mơnuih mơnam thun 2023, rơnoh pơhrui ngăn drăp kơnuk kơna hăng hơdră kah pha mă yua ngăn drăp thun 2023. Sem lăng hơdôm hră lăi pơthâo bruă mă mơng Sang phat kơđi, Anom bruă pơsir kơđi tơlơi; hơdôm hră lăi pơthâo mơng Kơnuk kơna kơ bruă pơgăn hưp ƀong kông ngăn, bruă ngă soh, bruă pơsir kơđi thun 2022. Sem lăng hră lăi pơthâo klah čun, lăng glăi bruă ngă tui tơlơi pơtrun mrô 30 kơ hơdră pơgang klin Covid-19.

Siu Đoan: Pơblang