VOV4.Jarai - Mơguah (22/8), Khua git gai pơ ala mơnuih ƀon sang dêh čar ơi Vương Đình Huệ git gai Jơnum lăng glăi bruă ngă tui akŏ bruă mrô 81 mơng Jơnum min apăn bruă Khua pơ ala mơnuih ƀon sang dêh čar tal XV hăng pok pơhai jơlan hơdră čih pơkra tơlơi phiăn, tơlơi črâo trun. Amăng mông Jơnum, Khua git gai pơ ala mơnuih ƀon sang dêh čar  ơi Vương Đình Huệ brơi thâo bruă ngă tui tơlơi klah čun mơng Ding jum kơđi čar hăng akŏ bruă mơng Jơnum min apăn bruă Khua pơ ala mơnuih ƀon sang dêh čar giăm 1 thun laih rơgao ba glăi lu tơlơi dưi yôm phăn. Bruă pok pơhai ngă tui hơmâo pơphun klă hloh, tañ hloh hăng tŭ yua.

Truh ră anai, Khua pơ ala mơnuih ƀon sang dêh čar hơmâo ba tơbiă 6 tơlơi phiăn, 8 tơlơi pơtrun. Jơnum min apăn bruă Khua pơ ala mơnuih ƀon sang dêh čar hơmâo 2 tơlơi črâo trun hăng 2 tơlơi pơtrun. Him lăng amăng Jơnum lok 4 pơ anăp anai amra sem lăng 7 črăn tơlơi phiăn, 1 tơlơi pơtrun hăng sem lăng tal blung a 7 črăn tơlơi phiăn pơkŏn. Khua git gai pơ ala mơnuih ƀon sang dêh čar ơi Vương Đình Huệ rơkâo anom bruă bơdjơ̆ nao kiăng đing nao sem lăng tong ten hơdôm črăn tơlơi phiăn, pơhlôm djơ̆ hăng bruă jao amăng čih pơkra tơlơi phăn dŏ glăi amăng rơwang thun mă bruă, tŏ tui pơplih phrâo amăng pơgôp hiăp, mă tơlơi pơgôp hiăp mơng mơnuih ƀon sang, hruă kjăp, tơpă sit hăng pơgăn bruă bưp ƀong, pơhlôm tơlơi dưi kơ khul grup amăng hơdôm tơlơi phiăn.

Siu Đoan: Pơblang