VOV4.Jarai - Tô̆ tui jơlan hơdră jơnum lok 10, hrơi anai, Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ rơwang bruă Tơlơi phiăn pơplih pơkra, pơhrua nao dong sa dua mơta tơlơi mơng Tơlơi phiăn rơnoh pôr pơhing hăng apui lơtrik hăng rơwang bruă Tơlơi phiăn pel ĕp kơđi tơlơi (pơplih pơkra). Rơwang bruă Tơlơi phiăn pơplih pơkra, pơhrua nao dong sa dua mơta tơlơi mơng Tơlơi phiăn anai kiăng djơ̆ hăng tơlơi kiăng, khom hmâo mơng bruă hơkrŭ măi mok tal 4, rơkâo mut hrom jar kơmar hăng hơkrŭ pơsir hơdôm tơlơi akă gal, tơlơi gun phrâo hmâo mơng bôh nik ñu wai lăng, pơhlôm tơlơi djơ̆ hrom amăng tơlơi phiăn mă yua ră anai gah wai lăng, mă yua rơnoh pôr pơhing hăng apui lơtrik. Hmâo 8 črăn hăng 116 mơta tơlơi, hră čih pơkra Tơlơi phiăn pel ĕp kơđi tơlơi pơkă kơ pơphun, pel ĕp kơđi tơlơi kơnuk kơna; tơlơi pơmin, tơlơi pơkă pơplih pơkra Tơlơi phiăn pel ĕp kơđi tơlơi lĕ lăi pơthâo abih hăng pơplih phrâo jơlan gah, hơdră pơtrun, gong gai mơng Ping gah hăng Kơnuk kơna kơ bruă pel ĕp kơđi tơlơi; djơ̆ hăng tơlơi kiăng pơplih pơkra bruă kơnuk kơna./.

Siu H’ Prăk: Pơblang