VOV4.Jarai - Tô̆ tui jơlan hơdră mông jơnum lok 10, mơguah lơ 19/4, Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ jơlan hơdră tal jơnum lok 3, Khua pơ ala mơnuih ƀôn sang dêh čar ta tal 15. Tui tơlơi pơkă hlâo jơlan hơdră tal jơnum lok 3, Khua pơ ala mơnuih ƀôn sang đing nao ƀơi Sang mă bruă Khua pơ ala mơnuih ƀôn sang dêh čar. Khă hnun hai ăt hmâo mơn tơlơi pơhlôm hlâo jơlan gah jơnum lăng nao rai mơng ataih amăng tơlơi kiăng ječ. Pơkă hlâo hơdôm hrơi mă bruă mơng Khua pơ ala mơnuih ƀôn sang lĕ 20 hrơi. Khua pơ ala mơnuih ƀôn sang pok phun amăng hrơi sa, lơ 23/5, pơkă hlâo pơđut amăng lơ 17/6. Kơnuk kơna rơkâo kơdun glăi hrơi lăi pơthâo rơwang bruă Tơlơi phiăn lŏn drŏn (pơplih pơkra) yua kơ lom pơdŏng rơwang bruă Tơlơi phiăn hmâo pơphun hmâo sa dua tơlơi phrâo kiăng hmâo dong mông kơsem min tŏng ten. Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo đing nao pơđĭ tui anô̆ kơjăp bruă tum pơƀut, ruah mă tơlơi gum pơhiăp khua pơ ala mơnuih ƀôn sang bơkơtuai amăng grŭp hăng ƀơi sang rông; gum hrom, prăp lui tŏng ten bruă lăi pơhing, hră pơ-ar, lăi pơthâo, pôr pơhing, hơdôm tơlơi kiăng kơ gơnam tam, anih anom pơgang, pơgăn klin ruă, kiăng djru klă kơ tal jơnum./.

Siu H’ Prăk: Pơblang