VOV4.Jarai - Tô̆ tui jơlan hơdră jơnum lok 10 čơtlăm lơ 18/4, gum pơhiăp ƀơƀiă tal blung a kơ rơwang bruă Tơlơi phiăn pel ĕp kơđi tơlơi, Jơnum min apăn bruă Khua pơ ala mơnuih ƀôn sang dêh čar ta rơkâo, tô̆ tui djă pioh hăng kơtưn brơi pel ĕp kơđi tơlơi gưl tơring glông kiăng pơgang, pơgăn hưp ƀong kông ngăn, tơlơi ƀu klă, tŭ jum mơnuih ƀôn sang hăng pơsir tơlơi ƀom kiơng. Lu tơlơi gum pơhiăp rơkâo đĭ khom kơsem min, hmâo jơlan pơplih phrâo pơphun bruă hăng bruă mă mơng anom pel ĕp kơđi tơlơi ƀơi gưl tơring glông djơ̆ hăng tơlơi kiăng rơguăt glông bruă, pơđĭ tui bôh tơhnal, bôh tŭ yua bruă mă. Pơphun pel ĕp kơđi tơlơi phun truh ră anai ăt djơ̆ mơn, djru Jơnum min mơnuih ƀôn sang gưl tơring glông kơ bruă pel ĕp kơđi tơlơi, pơgang pơgăn hưp ƀong kông ngăn, tơlơi ƀu klă, tŭ jum mơnuih ƀôn sang, pơsir tơlơi ƀom kiơng. Tui hăng jơlan hơdră, mơguah anai (19/4) Jơnum min apăn bruă Khua pơ ala mơnuih ƀôn sang dêh čar ta gum pơhiăp Jơlan hơdră lăng tui mơng Khua pơ ala mơnuih ƀôn sang dêh čar; Bruă prăp lui tal jơnum lok 3 Khua pơ ala mơnuih ƀôn sang dêh čar hăng pel ĕp, pơsit mrô mơnuih mă bruă amăng Jơnum min pel ĕp kơđi tơlơi mơnuih ƀôn sang dêh čar ta./.

Siu H’ Prăk: Pơblang