VOV4.Jarai - Tô̆ tui jơlan hơdră jơnum tal 15, mơguah anai (14/9), sa bôh yôm phăn dưi hmâo mơnuih pơ ala hăng mơnuih ƀôn sang đing nao, anun lĕ Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ hră čih tơlơi lăi pơthâo glăi bôh tơhnal lăng tui akô̆ bruă “Bruă ngă tui hơdră bruă, tơlơi phiăn kơ ngă tui pơkrem, pơgăn ngă khưi khai rơwang 2016-2021”. Anai lĕ sa amăng 2 akô̆ bruă lăng tui dlông hloh mơng Khua pơ ala mơnuih ƀôn sang dêh čar amăng thun 2022.

Khul lăi glăi bruă lăng tui pơmin lĕ, hrom hăng hơdôm bôh tơhnal dưi ngă lĕ, bruă pơkă prăk mă yua rim thun ngăn drăp kơnuk kơna akă djơ̆ hăng bôh nik ôh. Bruă pơplih bơwih ƀong, ngăn drap mă yua rơwang 2016-2021 kaih biă; prăk kơnuk kơna yua kơ sa dua bôh anom bơwih ƀong kơnuk kơna akă pơhlôm klă. Bruă wai lăng, mă yua lŏn, kông ngăn ƀơi sa dua bôh ding jum, gơnong bruă, plơi pla ƀu djơ̆ tơlơi pơkă; ăt dô̆ mơn tơlơi mă yua lŏn soh bôh than phun, ngă khưi khai đôč đăč. Anô̆ klă, kơčăo bruă mă yua lŏn dô̆ ƀiă, pơkă pioh lui hnun, rơwang bruă pioh lui hnun dô̆ lu; mrô, lŏn mă yua lui lơi soh ƀudah mă yua ƀu djơ̆ bôh than dô̆ hơnong mơn ƀơi giăm abih bang hơdôm bôh plơi pla./.

Siu H’ Prăk: Pơblang