VOV4.Jarai - Tô̆ tui  mông jơnum lok 10, Jơnum min apăn bruă Khua pơ ala mơnuih ƀôn sang dêh čar ta hmâo bơkơtuai Hră čih pơkra Tơlơi pơtrun pơsit mơng Khua pơ ala mơnuih ƀôn sang kơ pơphô sa dua hơdră pơkă, hơdră bruă pha ra pơđĭ kyar tơring čar Khánh Hòa. Ƀing khua pơ ala lăi lĕ, pơđĭ kyar Khánh Hòa ƀu djơ̆ kơnong kơ hmâo bôh tŭ yua bơwih ƀong ôh mơ̆, ñu dô̆ djru djă kơjăp tơlơi dưi pô ƀơi ia rơsĭ bul ia rơsĭ mơng Lŏn ia dong. Amăng mông jơnum, abih bang mơnuih amăng Jơnum min apăn bruă Khua pơ ala mơnuih ƀôn sang dêh čar ta tŭ ư ba bôh yôm hră čih Tơlơi pơtrun pơsit mơng Khua pơ ala mơnuih ƀôn sang kơ pơphô sa dua hơdră pơkă, hơdră bruă pha ra pơđĭ kyar tơring čar Khánh Hòa amăng jơlan hơdră pơjing tơlơi phiăn, phiăn pơtrun thun 2022. Tơdah dưi pel ĕp amăng Tal jơnum lok 3, Khua pơ ala mơnuih ƀôn sang dêh čar ta tal 15, tơring čar Khánh Hòa amra dưi ngă tui hơdôm hơdră bruă gum djru; pha ra kah hăng: đĭ dong rơnoh prăk čan; dưi hmâo ngăn drăp kơnuk kơna pơhrua nao hmâo tơhnal pơkă mơng mrô prăk pơhrui glăi đĭ tui; tơring čar dưi pơsit akô̆ bruă pơkă kual hrom pơdŏng kual mă bruă; pơsit pơplih bôh than mă yua lŏn ngă hmua pơdai yŭ kơ 500 ektar, pơplih dlai bơwih ƀong yŭ kơ 1 rơbâo ektar tui tơlơi jao mơng Khua dêh čar./.

Siu H’ Prăk: Pơblang