VOV4.Jarai - Mơguah lơ 11/7, Pok phun mông jơnum tal 13 mơng Jơnum min apăn bruă Khua pơ ala mơnuih ƀôn sang dêh čar ta. Pơhiăp amăng mông pok phun, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, mông jơnum anai, Jơnum min apăn bruă Khua pơ ala mơnuih ƀôn sang dêh čar ta amra klah čun tal jơnum lok 3 hăng gum pơhiăp yak blung a kơ bruă prăp lui tal jơnum lok 4 mơng Khua pơ ala mơnuih ƀôn sang dêh čar ta. Mông jơnum ăt gum pơhiăp mơn yak blung a kơ prăp lui tal jơnum lok 4 pơkă hlâo amra pơphun amăng blan 10 thun anai.

Đơ đam anih jơnum

Phun than tal jơnum anai lĕ bruă pơdŏng tơlơi phiăn, pel ĕp lăng glăi lu rơwang bruă tơlơi phiăn. Tơdơi kơ mông pok phun, abih bang ding kơna Jơnum min apăn bruă Khua pơ ala mơnuih ƀôn sang dêh čar ta ƀuh ƀô̆ tŭ ư pel ĕp laih Tơlơi pơtrun pơsiut kơ bruă pơsit pơtrun pơplih bôh than mă yua dlai tlô, lŏn dlai hăng lŏn ngă hmua pơdai mơng Rơwang bruă pơdŏng pơkra jơlan đuăi hmar Pơngŏ – Dơnung gah Ngŏ rơwang mơng thun 2021-2025. Kiăo tui anun, Jơnum min apăn bruă Khua pơ ala mơnuih ƀôn sang dêh čar ta brơi pơplih bôh than mă yua lŏn dlai tlô, lŏn ngă hmua pơdai 2 bơyan hăng lu hloh đĭ dong bơhmu hăng Tơlơi pơtrun pơsit mơng Khua pơ ala mơnuih ƀôn sang hăng pơplih bôh than mă yua dlai pơgang hlôm hlâo kiăng hmao pok pơhai ngă tui djơ̆ rơnoh bruă. Hrom hăng anun rơkâo Kơnuk kơna ngă giong hră pơ-ar pơplih bôh than mă yua kiăng lăi pơthâo glăi hăng Khua pơ ala mơnuih ƀôn sang amăng tal jơnum lok 4 pơ̆ anăp./.

Siu H’ Prăk: Pơblang