VOV4.Jarai-Ăt amăng mông jơnum pơčrông sa bruă Tơlơi phiăn amăng blan 8 mơ̆ng Jơnum min apăn bruă phun pơ ala mơnuih ƀôn sang dêh čar. Lơ 16/8, Jơnum min apăn bruă phun pơ ala mơnuih ƀôn sang dêh čar pơgôp hiăp kơ kơčăo bruă Tơlơi phiăn mơnuih ƀôn sang pơhlôm hlâo. Anai lĕ tơlơi phiăn tơnap biă mă, anŏ ngă tui prong, lu mơnuih, amra pơdah thâo kơ ƀing pơ ala mơnuih ƀôn sang dêh čar pơgôp hiăp tal blung jơnum lok 4, tal 15. Tơlơi phiăn anai hơmâo 7 črăn, 75 mơta tơlơi pơkă, pơtum nao kơ 6 jơlan hơdră kah hăng :

Pơtong glăi tong ten hnong răm ƀăm mơ̆ng tơlơi truh lŏn adai ngă, tơlơi truh blah sat blah wang amăng bruă mơnuih ƀôn sang djru hrom pơhlôm hlâo bong glăi pơgang lŏn ia; Pơpha bruă git gai wai lăng amăng kơnuk kơna hăng pơphă bruă pơhlôm, pơgang bong glăi tơlơi truh sat hăng pơsir tơlơi truh hơmâo; pơkă kơ bruă mă pơgang mơnuih ƀôn sang ƀơi anăp kơ tơlơi truh djru mơnuih ƀôn sang răm ƀăm; Pơblih phrâo pơphun bruă mă mơ̆ng Khul git gai pơhlôm pơgang gưl dêh čar; Mă yua boh thâo ia rơgơi kah hăng tơlơi pơhing hmar big data amăng bruă pơhlôm pơgang tơlơi truh sat; Pơkă kơ tơlơi phiăn ječ ameč kơ bruă pơhlôm pơgang mơ̆ng mơnuih ƀôn sang.

Kơ bruă čih pơkra Tơlơi phiăn pơhlôm pơgang mơ̆ng mơnuih ƀôn sang djơ̆ găl hăng tơlơi pơhing amăng mông hơmâo tơlơi truh lŏn adai ngă, klin kheng duam ruă, tơlơi pơhing rung răng ƀơi rŏng lŏn tơnah hăng amăng kual lu tơlơi rung răng ƀu dưi thâo hlâo.

Nay Jek: Pơblang