VOV4.Jarai-Ăt amăng hơdră jơnum lok 9, lơ 14/3, pơgôp hiăp kơ boh tơhnal ngă tui bruă djru pơsir tơlơi mơnuih ƀôn sang kiăng blan 2/2022, Jơnum min apăn bruă git gai pơ ala mơnuih ƀôn sang dêh čar rơkâo Kơnuk kơna, Khua dêh čar đing nao, git gai anăm mơneč mă ôh nua ia săng đĭ, ngă bruă ĕp kơmlai. Mơnuih ƀôn sang ruah khua lăng yôm amăng bruă hmao kru mơ̆ng khua mua pơ ala mơnuih ƀôn sang đing nao kơ tơlơi nua ia săng đĭ na nao, yua bơbeč djơ̆ tơlơi mă bruă, bơwih ƀong huă, hơdip mơ̆ng mơnuih ƀôn sang.

Tơlơi nua ia săng, ia jâo đĭ hrom hăng lu nua gơnam sĭ mơdrô pơkŏn đĭ tui, bruă bơwih bơwăng pơkŏn amăng tơlơi hơdip mơda ăt đĭ tui soh, bruă ngă hmua mơ̆ng mơnuih ƀôn sang ană plơi pla bưp lu tơlơi tơnap tap. Jơnum min apăn bruă pơ ala mơnuih ƀôn sang dêh čar rơkâo Kơnuk kơna git gai Ding jum wai lăng tuh tia hăng sĭ mơdrô, Ding jum prăk kăk hăng djop ding jum, anom bruă kiăng hơmâo hơdră wai lăng, pel ĕp bruă pơkă nua gơnam sĭ mơdrô, nua bơwih bơwăng đah mơ̆ng hơmâo hơdră pơđĭ trun nua djơ̆ lăp, pơgăn mơtam bruă kiăo tui kơ nua gơnam sĭ mơdrô đĭ trun ĕp kơmlai; đing nao, laih anun hơmâo hơdră djru mơnuih ƀôn sang hăng sang bruă sĭ mơdrô hơđong pran jua.

Nay Jek: Pơblang