VOV4.Jarai - Grŭp Khua Jơnum min djop djuai ania mơnuih mơnam dêh čar Việt Nam phrâo hmâo Lăi pơthâo glăi kơ bôh tơhnal lăng tui mơng Jơnum min djop djuai ania mơnuih mơnam dêh čar Việt Nam mơng tơdơi kơ tal jơnum lok 2 truh tal jơnum lok 3, Khua pơ ala mơnuih ƀôn sang tal 15. Hrom hăng bruă ngă giong Kơčăo bruă lăng tui amăng sa thun 2021, Grŭp hmâo pok pơhai 10 bôh yôm lăng tui, hluai tui kơčăo bruă lăng tui hăng lăi glăi mơng mơnuih mơnam thun 2022. Hơdôm bruă lăng tui leng kơ hmâo hơdôm bôh tơhnal yak blung a yôm phăn, djru pơplih pơkra, hơkrŭ glăi hơdôm bruă akă dưi ngă, aka gal hăng ngă tui, bơni hơdôm bôh tơhnal klă amăng hơdôm bruă pha ra... Thun 2022, Jơnum min djop djuai ania mơnuih mơnam dêh čar Việt Nam git gai lăng tui sa dua bôh yôm phăn kah hăng: bruă pơhrăm pran jua mơng mơnuih apăn akô̆, mơnuih apăn bruă phun, mơnuih ping gah; bruă ngă tui hơdră bruă djru mơnuih mă bruă hăng mơnuih mă yua mơnuih mă bruă bưp tơnap yua kơ klin Covid-19; bruă pơsir sa dua mơta kơđi tơlơi bruă ƀom kiơng ngă tơnap, pơhrư̆i sui hrơi; bruă ngă tui Jơlan hơdră pơkă mơng lŏn ia pơđĭ kyar bơwih ƀong – mơnuih mơnam kual djuai ania ƀiă hăng kual čư̆ siăng./.

Siu H’ Prăk: Pơblang