VOV4.Jarai - Mơguah lơ 22/6, ƀơi tơring čar Bà Riạ - Vũng Tàu, Jơnum min gum pơgôp mơnuih đăo khŏp Việt Nam, rơwang thun 2018-2023 hơmâo pơphun jơnum ƀu tui tơđar, pơhrua mơnuih mă bruă prăp lui kơ mông Jơnum ruah khua pơ ala mơnuih tui đăo khŏp Việt Nam akŏ pơdong hăng pơgang ba lŏn ia rơwang thun 2023-2028. Hăng tơlơi gơgrong bruă prong, tơpă ară, Mông jơnum hơmâo bơkơtuai, tŭ ư Tơlơi pơsit akŏ pơdong Grup pơphun Jơnum ruah khua pơ ala mơnuih tui đăo khŏp Việt Nam man pơdong hăng pơgang ba lŏn ia tal 8, rơwang thun 2023-2028; tŭ ư hăng hră pơdah mơng Khul khua git gai pơƀuh mơnuih ngă khua amăng Khul khua git gai bruă, 100% čô khua tŭ ư ruah pơhrua ơi Nguyễn Văn Toàn, Ding kơna khul khua git gai, ngă Kơ-iăng khua apăn bruă git gai Jơnum min gum pơgôp Đăo khŏp Việt Nam amăng rơwang thun 2018-2023. Hluai tui mông jơnum ƀu pơthâo hlâo anai, ƀing khua ăt hơmâo pơtŏp bruă pơphun Jơnum ruah khua pơ ala mơnuih tui đăo khŏp Việt Nam man pơdong hăng pơgang ba lŏn ia rơwang thun 2023-2028.

Siu H’Mai: Pơblang