VOV4.Jarai - Tŏ tui mông jơnum lok 13, mơguah anai lơ 12/7, Jơnum min khua apăn bruă pơ ala mơnuih ƀon sang dêh čar klah čun mông jơnum lok 3, hăng pơgôp hiăp bruă prăp lui kơ mông Jơnum lok 4, Khua git gai pơ ala mơnuih ƀon sang dêh čar tal 15. Jơnum lok 3, Khua mua pơ ala mơnuih ƀon sang hơmâo pơsit 5 tơlơi phiăn, 17 tơlơi pơtrun, pơgôp hiăp kơ  6 kơčăo bruă tơlơi phiăn pơkŏn hăng pơsit brơi lu tơlơi yôm ƀu kơnong amăng thun 2022 đôč ôh mơ̆ pioh mă yua amăng rơwang thun 2021-2025 wơ̆t hăng hơdôm thun pơ anăp dong. Kơ bruă prăp lui jơnum lok 4, Khua git gai pơ ala mơnuih ƀon sang dêh čar ơi Vương Đình Huệ brơi thâo: Jơnum pơgôp hiăp blung a kơ bruă prăp lui Jơnum lok 4 amra pơphun amăng blan 10 thun anai. Ƀơi mông jơnum anai, bruă yôm phun lĕ čih pơkra tơlơi phiăn, sem lăng pơsit brơi lu tơlơi phiăn, pơgôp hiăp blung a hăng lu tơlơi phiăn. Hăng bruă čih pơkra tơlơi phiăn lu tui anun jing bruă prăp rơmet, ngă hrŏm hăng Kơnuk kơna amăng bruă čih pơkra, anom bruă sem lăng, hơdră ngă bruă hiư̆m pă kiăng mông jơnum lok 4 ngă tui djơ̆ akŏ bruă hăng tŭ yua klă hloh.

Siu H’Mai: Pơblang