VOV4.Jarai - Mơguah lơ 15/2, ƀơi Sang bruă khua pơ ala mơnuih ƀon sang dêh čar, pơphun jơnum lok 8, Jơnum min khua apăn bruă pơ ala mơnuih ƀon sang dêh čar. Pơphun mơng lơ 15 truh lơ 17/2, ƀơi mông jơnum anai, Jơnum min khua apăn bruă pơgôp hiăp kơ lu tơlơi yôm phun. Pơgôp hiăp kơ Tơlơi phiăn tơhan pôlih rŭi hyu hơdeč (Cảnh sát cơ động), ƀing khua dŏ bơngơ̆t mơn lơ̆m Tơlơi phiăn pơkă tơhan rŭi hyu hơdeč dưi mut nao pơ anom bruă, khul grup, anih dŏ hơjăn pô. Hăng bruă mut nao pơ anom bruă pơtom hiăp hăng čar rơngiao, anom bruă khua anih jưh pơ ala kơ dêh čar tač rơngiao, anom bruă pơ ala kơ jar kmar...khŏm kiăo tui tơlơi phiăn Việt Nam hăng tơlơi phiăn jar kmar. Pơhiăp ƀơi mông jơnum, Khua git gai pơ ala mơnuih ƀon sang ơi Vương Đình Huệ kiăng tơhan cơ động ngă bruă hơdeč hmar, rơgơi hloh, dưi pơgang anih hơmâo tơlơi truh. Ơi Vương Đình Huệ ăt kiăng brơi tơhan anai mă bruă ƀơi hơdôm anih yôm phun. Pơhlôm git gai dưm kơnar djơ̆ hrŏm amăng bruă git gai tơhan pôlih rŭi hyu.

Siu H’Mai: Pơblang