VOV4.Jarai - Tŏ tui jơlan hơdră jơnum lok 16, mơguah hrơi anai (11/10) Jơnum min khua pơ ala mơnuih ƀon sang dêh čar pơgôp hiăp hră lăi pơthâo glăi mơng Kơnuk kơna kơ bruă pơđĭ kyar bơwih ƀong huă - mơnuih mơnam thun 2022 hăng prăk kăk kơnuk kơna. Thun 2022 boh than pơđĭ kyar bơwih ƀong huă - mơnuih mơnam him lăng amra hơmâo hăng rơgao mrô 14/15 hơnong pơkă mơng Khua mua pơ ala mơnuih ƀon sang jao, amăng anun đĭ kyar bơwih ƀong huă him lăng hơmâo năng ai 8%, rơgao 6-6,5% hơnong pơkă, jing tơlơi gêh gal brơi hơdôm thun pơ anăp anai dưi pơđĭ kyar bơwih ƀong huă mơng akŏ bruă 5 thun 2021-2025. Amăng thun 2023, him lăng ƀơi rŏng lŏn tơnah, amăng lŏn ia ta hơmâo tơlơi gêh gal, tơlơi tơnap, tơlơi lông lăng samơ̆ tơlơi tơnap, tơlơi lông lăng lu hloh, biă ñu hăng bruă bơwih ƀong prong. Yua hnun, Kơnuk kơna kiăng djă bong hơđong tơlơi bơwih ƀong prong, wai lăng klă bruă pơđĭ nua gơnam ča čot, pơtrut đĭ kyar, pơhlôm bơkơnar tơlơi bơwih ƀong. Khut khăt hăng pơtrut ngă tañ hơdôm bruă yôm phun či pơđĭ kyar, Jơlan hơdră rŭ glăi hăng pơđĭ kyar bơwih ƀong huă - mơnuih mơnam, 3 Jơlan hơdră dêh čar: Man pơdong plơi pla phrâo, pơđĭ kyar bơwih ƀong huă - mơnuih mơnam kual mơnuih ƀon sang djuai ƀiă hăng kual čư̆ siăng hăng lŏm lui tơlơi rin rơpa hơđong kơjăp.

Siu H’Mai: Pơblang