VOV4.Jarai - “Lăng glăi bruă gơgrong mơnuih apăn akô̆ hơdôm bôh anom bruă tơdah pioh hmâo tơlơi kaih pơsir prăk yua bơwih ƀong kơ bruă hrom”, anai lĕ tơlơi pơsit mơng Khua Jơnum min mơnuih ƀôn sang tơring čar Daklak amăng mông jơnum Jơnum min mơnuih ƀôn sang tui tơđar blan 8/2022 pơphun amăng lơ 13/9 lom pơsit bôh tơhnal ngă tui kơčao bruă pơđĭ kyar bơwih ƀong – mơnuih mơnam, pơhlôm pơgang lŏn ia, plơi pla blan 8 pok pơhai bruă mă blan 9 hăng hơdôm blan rơnuč thun.

Gah kơčao bruă tuh pơplai bruă hrom thun 2022, tơring čar Daklak pơpha brơi laih hơdôm rơwang bruă hăng Keh prăk pơgang ba čan sang prăk kơ anom bơwih ƀong găp ƀrô hăng anet hăng mrô prăk rơbêh kơ 3.600 klai prăk. Truh ră anai hmâo pơsir mă rơbêh kơ 913 klai prăk đôč, dưm dưm hăng 26% kơčao bruă. Ƀiă hloh bơhmu hăng prăk pơsir hrom mơng đơ đam dêh čar lĕ 34%. Tơdơi kơ pơblang hơdôm bôh than ba truh kaih rơnoh bruă, Jơnum min mơnuih ƀôn sang tơring čar Daklak hmâo rơkâo laih pơdŏng 4 grŭp hyu mă bruă hăng hơdôm mơnuih tuh pơplai kiăng pel ĕp pơtrut pơsur, pơtlaih tơlơi tơnap, tơlơi gun; rơkâo khua hơdôm gơnong bruă khom gơgrong ba tơdah dô̆ pioh ba truh tơlơi kaih pơsir prăk mă yua anun./.

Siu H’ Prăk: Pơblang