VOV4.Jarai - Mơguah lơ 20/5, Jơnum min pơ ala mơnuih ƀon sang ƀon prong Hà Nội tal 16, pơphun Jơnum sem lăng, bơkơtuai, dưm dăp prăk pioh pơkra Jơlan bĕ 4 - kual plơi prong jưh jom či pơhrua amăng amăng hră pơ-ar Pơdah pơ Khua mua pơ ala mơnuih ƀon sang dêh čar sem lăng. Anai jing kơčăo bruă yôm mơng dêh čar yua Khua mua pơ ala mơnuih ƀon sang dêh čar pơsit tuh pơ plai. Hăng 100% mrô khua tŭ ư, Jơnum min pơ ala mơnuih ƀon sang ƀon prong Hà Nội tŭ ư mrô prăk pioh pơkra jơlan bĕ mrô 4- Kual plơi prong jưh jom mă mơng prăk ƀon prong năng ai rơbêh 23.520 klai prăk.

Jơlan anai glông rơbêh 112km, găn nao pơ 3 boh tơring čar, ƀon prong kah hăng Hà Nội, Hưng Yên, Bắc Ninh. Anih pơphun ñu ƀơi jơlan rơdêh đuăi hmar Nội Bài - Lào Cai gah tơring glông Sóc Sơn, ƀon prong Hà Nội, anih tuč rơnuč ñu lĕ ƀơi jơlan rơdêh đuăi hmar Nội Bài - Hạ Long gah tơring glông Quế Võ, tơring Bắc Ninh. Him lăng mrô prăk rơbêh 85.800 klai prăk, hrơi ngă kơčăo bruă anai mơng thun 2022 truh thun 2027.

Siu H’Mai: Pơblang