VOV4.Jarai - Čơtlăm lơ 9/2, ơi Khuất Việt Hùng, Kơ-iăng Khua gơgrong bruă Jơnum min pơhlôm ƀơi jơlan nao rai lŏn ia ta hrom hăng grŭp hyu mă bruă nao pơ̆ Gialai kiăng pel ĕp anih anom, gum hrom hăng khua git gai tơring čar črâo ba hơkrŭ glăi tơlơi truh ƀơi jơlan nao rai ngă 6 čô mơnuih djai, 3 čô mơnuih rơka ruă amăng mơguah lơ 9/2.

Tơdơi kơ hmâo tơlơi truh mơtăm, Khua pơ ala kơ Grŭp pơhlôm ƀơi jơlan nao rai tơring čar Gialai hmâo nao čuă tơña bla, rơngôt hrom hăng djru 3 klăk prăk kơ sa čô mơnuih rơka ruă, rim sang anô̆ hmâo mơnuih djai lĕ 5 klăk prăk. Tơring glông Đăk Đoa ăt djru mơn 3 klăk prăk sa čô mơnuih rơka ruă hăng 5 klăk prăk kơ sang anô̆ hmâo mơnuih djai. Tơdơi kơ mông mă bruă mơtăm, Grŭp hyu mă bruă mơng Jơnum min pơhlôm jơlan nao rai dêh čar ta hmâo nao tơña bla, pơtrut pơsur hơdôm bôh sang anô̆ hmâo mơnuih djai amăng tơlơi truh ngă ruă pran jua, hrưn đĭ amăng tơlơi hơdip./.

Siu H’ Prăk: Pơblang