Jơnum ngui bruă Sầu riêng Dak Lak thun 2026 hơmâo 17 bruă mă phun lăp đing nao. Ƀuh rơđah ñu kah hăng: jơnum ngă yang pơphun prong pok pơhai kơ tal ngui ngor ƀơi tơdron lăk anăn 10/3; jơnum bơkơtuai kơ bruă khul ngă bruă anih pla pơjing boh sầu riêng hơđong kơjăp; jơnum mơak pơdah pơkra ming mơnong ƀong anăp nao kiăng dưi čih pioh, anŏ kơđŏm yom amăng hơdrôm hră prong hloh Việt Nam hơmâo truh 102 mơta mơnong ƀong, pơkra ming boh durian, sầu riêng; anih pơdă gơnam pơkra mơ̆ng sầu riêng hăng gơnam sĭ mơdrô hiam dưi pơsit OCOP; hơdôm tuôr ba hyu tuai čuă ngui amăng đang boh sầu riêng hăng tuai hyu ngui ĕp lăng gru grua hiam, anih ngă hmua; hrŏm hăng lu tơlơi adoh suang mơak, pơdă rup hăng jơnum jak iâu ngă hrŏm bruă sĭ mơdrô….

Rơđah biă mă ñu, anih pơdă gơnam sa hnơ̆ng dơnong pioh kơ boh durian sầu riêng đôc hăng gơnam hiam hơmâo pơsit OCOP hơmâo truh 310 čơgăn. Gah bruă tuai hyu ngui lĕ, lu sang bruă mơdrô pơphun brơi 8 jơlan hơdră hyu ngui dŏ glăi găng rơgao amăng plơi pla. Bruă ngă rŭi rơdêh hơmâo 500 boh rơdeh mơkrah cơgăn pơgiăng gơnam juăt lăi Bán tải pơgiăng hyu, pôr kơ boh durian buă wông, rŭi nao mơ̆ng Krông Pač, glăi truh pơ Ƀuôn Ma Thuôt. Jơlan hơdră adoh suang prong, lu khul mơnuih mơnam hăng găn nao djop čơgăn pơdă mơnong ƀong 102 mơta gơnam pơkra ming mơ̆ng boh sầu riêng soh. Pơplông đuăi Tuy Hòa 2026 akŏ ñu “Čơkă  mơguah ƀơi ia rơsĭ” pơhưč 2.600 čô mơnuih pơplông đuăi.

Jơnum ngui mơak pơkra ming mơnong ƀong mơ̆ng Sầu riêng Dak Lak dưi pơphun ƀơi plơi hiam ƀôn prong phrâo Eco Palace, phường Ƀuôn Ma Thuôt. Pơ anai dŏ lăi pơthâo lu mơta boh troh, gơnam đang hmua, hiam jơman hloh mơ̆ng tơring čar hăng gơnam pioh kơ tuai hyu ngui, gơnam gru grua kual Dap Kơdư, gơnam mơ̆ng plơi pla pơkra ming gơna gru grua đưm hăng djop mơta mơnong ƀong huă, ia mơñum lêng kơ pơkra ming mơ̆ng boh sầu riêng soh. Hrŏm hăng anun, bruă mă hơtŭk riă tơnă hơbai, pơkra ming mơnong ƀong huă, jơnum ngui hơmâo lu jơlan hơdră pơdah ayun suang atông čing hơgor, pĕ gông atông brô̆ djop mơta gông brô̆ kual Dap Kơdư; adoh suang, ngui ngor tui gru grua plơi pla đưm, kač rup ngui ƀơi akiăng jơlan ƀôn prong hăng jơlan hơdră tơlơi adoh suang. Ƀing tuai ăt amra hyu sem lăng, dŏ glăi ĕp blơi mơnong ƀong huă hăng ia mơñum, ƀudah tŭ mă mơnong ƀong huă hăng ia mơñum brơi soh đôč, ƀu apah prăk ôh hơmâo pơkra mơ̆ng boh durian, amăng anun hơmâo ia kơphê lŭk ia boh durian hăng trà sửa boh sầu riêng mơ̆n.

Ơi Lê Hoàng Cơ, Khua sang bruă Dam San Tourist, Khua khul pơphun jơnum bruă pơkra ming mơnong ƀong huă mơ̆ng boh Sầu Riêng, brơi thâo, djop mơnuih thâo tơnă hơbai mơ̆ng 20 grup pơplông, rai amăng djop anih amăng dêh čar ta, gum hrŏm pơkra ming mơnong ƀong huă hăng pơdah brơi lăng bruă pơkra ming 102 mơta mơnong ƀong, hơmâo pơkra pơjing mơ̆ng boh sầu riêng Dak Lak. Bruă ngă anai tŭ yap bruă ngă kơđom lui, čih pioh amăng hơdrôm hră prong hloh Việt Nam.

“Sầu riêng lĕ djuai boh troh đang hmua prăk klăk prăk klai khom pơđĭ tui rơnoh kơnuih hing ang prong tui, rơngiao kơ pĕ ƀong tui tơđar lĕ, ƀing ta pơkra ming lu mơta pơjing mơnong ƀong jơman. Giong pơsit anŏ kơđŏm pioh 102 mơta gơnam ƀong huă pơkra mơ̆ng boh sầu riêng anun lĕ jing anŏ pioh glăi kơ ta tuč rơnuč amra dưi pok anih sĭ mơdrô, sang sĭ mơdrô mơnong ƀong huă, ruăi pơdă lăi pơthâo lu mơta mơnong ƀong huă hăng boh sầu riêng ƀơi djop anih, tăp năng djop anih amăng dêh čar hăng jar kmar”.

Sa bruă mă dơ̆ng him lăng dưi hơmâo sang bruă Guinnes rŏng lŏn tơnah amra pơsit lĕ, khul rơdêh ruai jing rơdêh ha klah pơgiăng gơnam Bán tải, pơgiăng boh sầu riêng mơ̆ng Krông Pač nao pơ tong krah plơi prong jơlan klah 6 juăt lăi Ngã 6 hăng djop arăt jơlan amăng plơi prong Ƀuôn Ma Thuôt. Khul rơdêh rŭi anai ƀơi anih pơphun Jơnum ngui boh sầu riêng Dak Lak thun 2026, hơmâo 500 boh rơdêh, rim boh rơdêh pơgiăng 200 kg bohsầu riêng. Khul rơdêh pơphun nao mơ̆ng Tơdron lăk Tân An, să Krông Pač, rŭi nao pơ jơlan 26 truh pơ jơlan 27 hăng mut nao pơ jơlan prong Võ Nguyên Giáp. Khul ăt rŭi nao pơ tong krah jơlan čơlah 6 amăng plơi prong jing anih Ngã 6, dar hyu mut amăng hơdôm arăt jơlan mut amăng plơi prong Ƀuôn Ma Thuôt.

Yă Trần Vũ Thùy Linh, Kơ-iăng Khua khul pơphun rŭi rơdêh anai, brơi thâo, Khul pơphun rŭi hơmâo tŭ mă mrô rơkâo čih anăn či rŭi hrŏm truh 600 pô rơdêh, jing rơgao hĭ 100 boh rơdêh. Anom bruă Guinness ăt mơ-it rai khua pơ ala truh pơ Dak Lak, kiăng ngă hrŏm pơsit čih pioh amăng hơdrôm hră Guinness rŏng lŏn tơnah:

“Gah anom bruă Guinness pơkă tong ten biă mă, mrô rơnoh boh sầu riêng pơgiăng amăng rơdêh khom boh sit nik 100% truh kơ mơnuih mơgăt đĭ rơdêh hai khom hơmâo phung, anăn, thun tơkeng čih djop ƀing mơgăt rơdêh. Ră anai, khul boh sầu riêng tơring čar hơmâo ngă djop laih hră pơar anai. Rơngiao kơ anun, Khul ăt jak iâu sa čô mơnuih rơgơi kơhnâo  mơ̆ng Guinness rai pơ Dak Lak kiăng pơtong brơi sit nik. Giong jơnum ngui năng ai ñu 30 mơnit, gơñu amra sem lăng, jŭ yap tong ten, pơtong glăi ha wơ̆t dơ̆ng. Tơdah ƀu hơmâo tơlơi hơgĕt soh glăi lĕ, amra pơsit mơtam yơh”.

Tui hăng Khul pơphun bruă ngui, Jơnum ngui boh sâu riêng Dak Lăk thun 2026 ƀu kơnong pơƀuh anăn gơnam hmư̆ hing sâu riêng đôč ôh, ăt anăp nao akŏ pơjing anih pơkra gơnam, pơtruh nao rai pơkra hăng ba hyu sĭ, pơhưč tuh pơ alin măi mok pơkra gơnam klă hloh, logistics, hăng đĭ kyar ba tuai hyu ngui amăng đang hmua. Dak Lăk glăk ƀơ ƀrư̆ ba tơlơi ngui ngor sâu riêng jing bruă prong gưl dêh čar, anăp nao jar kmar.

Ơi Trần Hồng Tiến, Khua gơnong bruă gru grua, bơkjăp drơi jăn hăng tuai čuă ngui tơring čar Dak Lăk brơi thâo, hơdôm tuor hyu ngui amăng đang sâu riêng hơmâo ngă ƀu kơnong bơwih brơi hrơi ngui đôč ôh, ăt hơmâo sem lăng tong ten ngă hiưm pă pơjing rai bruă čơkă tuai hyu ngui na nao mơtăm, djru ba bơyan sâu riêng jing anih čơkă tuai rim thun mơ̆ng Dak Lăk.

“Hơdôm tuor anai ƀu kơnong bơwih brơi amăng hrơi ngui anai đôč ôh, tơdơi anai ăt hơmâo sem lăng tong ten pơjing tour hyu ngui na nao rim thun mơtăm yơh. Năng ai ƀu hơmâo pơphun jơnum rim thun ôh, samơ̆ kiăng abih bang rai ngui pơ Dak Lăk dưi ĕp lăng bơyan pla, hơmâo ƀong lăng boh troh, hơmâo lăng bruă arăng pĕ pơhrui, pơkra gơnam, pioh amăng hruh hiưm pă. Tơdơi kơ mông ngui anai gơmơi čang rơmang rim bơyan sâu riêng jing hrơi abih bang hơdor hăng hor či rai pơ Dak Lăk”.

Kơ boh tŭ yua sit nik mơ̆ng Jơnum ngui sâu riêng Dak Lăk thun 2026 hăng mơnuih ngă hmua, biă ñu lĕ pok prong anih ba hyu gơnam, pơhưč tuh pơ alin, pơtrut sĭ mơdrô hăng hơdôm hơnong pơkă lơ̆m pơđut mông jơnum, yă Đặng Thị Thuỷ, Kơ-iăng khua gơnong bruă hmua hăng ayuh hyiăng tơring čar Dak Lăk brơi thâo:

“Gơnong bruă hơmâo laih jơlan ngă bruă rơđah rơđông či pơthâo brơi Jơnum min mơnuih ƀôn sang tơring čar hơdră ngă bruă abih bang, amăng bruă wai lăng boh sâu riêng. Gơmơi glăk lăi pơthâo hăng Jơnum min mơnuih ƀôn sang tơring čar čih pơkra ngă hră pơtrut mă yua boh thâo mrô, amăng anun hơmâo bruă mă 30 hrơi mlăm. Dua lĕ ngă tui tơlơi pơtrun sem lăng rơđah tơdơi kơ hră pơ-ar hơmâo ngă giong, ră anai hăng bruă brơi gru kơnăl anih pla hăng anih anung gơnam lĕ gơmơi pơtrut tañ, ngă hiưm pă bĕ hĭ anŏ pleč ƀlor mrô anih pla”.

Tơring čar Dak Lăk glăk hơmâo giăm 45.000ha đang sâu riêng, jing rơbêh 1/5 đơ đam đang sâu riêng amăng dêh čar. Thun 2025, boh sâu riêng mơ̆ng tơring car hơmâo 390 rơbâo tơn, ba sĭ pơ tač rơngiao năng ai 1,1 klai USD, ba boh sâu riêng jing sa amăng hơdôm bruă ngă hmua akŏ phun mơ̆ng tơring čar. Gah tlôn mrô ba glăi anun, jing tơlơi bơwih ƀong mơ̆ng hơdôm pluh rơbâo boh sang anŏ, jing tơlơi pơplih mơ̆ng lu plơi pla hăng tơlơi hơmâo pioh či đĭ kyar, pơtrut tui anŏ yom mơ̆ng gru grua đưm.