Jơnum ngui sâu riêng Dak Lăk thun 2026 hơmâo pơphun mơ̆ng kơnôl 15/8 -2/9, hăng 18 bruă jơnum akŏ phun, wơ̆t hăng rơbêh 40 bruă mă pơkŏn dong. amăng hrơi mông anai, tơring čar Dak Lăk hơmâo čơkă năng ai 750.000 wơ̆t tuai nao ngui, amăng anun rơbêh kơ 275.000 wơ̆t tuai đih pơdơi glăi pơ sang jưh tuai, prăk pơhrui mơ̆ng bruă čơkă tuai hơmâo giăm 1.300 klai prăk.

Ơi Trần Quốc Toàn, Kơ-iăng khua gơnong bruă pơkra gơnam sĭ mơdrô tơring čar Dak Lăk brơi thâo, mông jơnum pơtrut bruă pơtruh nao rai, ngă hrŏm sĭ mơdrô gơnam, lơ̆m hơmâo 9 pok hră hơmâo kĭ bơdjơ̆ nao hơjai ngă rơ-ot, logistics, pơkra gơnam hiam laih anun hơmâo lu sang bruă, mơnuih mơnam gum pơkra pơjing, ba sĭ gơnam, nua ñu giăm 9.000 klai. Khă hnun, tơring čar ăt kiăng sem lăng rơđah anŏ tŭ yua mơ̆ng hră hơmâo kĭ:“Hơdôm pok hră hơmâo kĭ ƀơi mông Jơnum ngui jing tơlơi gêh găl prong biă yơh či ngă hrŏm, samơ̆ bruă anai jing bruă kĭ pơkôl hnăng blung đôč. Boh tŭ yua ngă bruă sit nik, mrô hră hơmâo kĭ, hră rơkâo blơi gơnam, hăng prăk pơhrui glăi tơdơi kơ kĭ pơkôl ngă hrŏm ăt kiăng krăp lăng, tum pơƀut glăi. Kar kăi hnun mơn, bruă pơtrut pơsur ƀơi plang boh thâo mrô, tơdah kơnong pơƀut ngă amăng mông Jơnum ngui đôč jing tơnap mơn mơ̆ng hơmâo anih sĭ mơdrô hơđong na nao. Yua hnun, tui hăng Gơnong bruă pơkra gơnam sĭ mơdrô, tơdơi kơ mông Jơnum ngui khŏm pơplih kơtang mơ̆ng “pơsur ngă bruă hluai tui mông jơnum” hơdai nao “pơsur ngă bruă kiăo tui anih sĭ mơdrô hăng prăk pơhrui glăi mơ̆ng bruă sĭ mơdrô anun”.

Klah čun mông jơnum, ơi Đào Mỹ, Kơ-iăng khua Jơnum min mơnuih ƀôn sang tơring čar Dak Lăk, Khua anom bruă pơphun jơnum ngui kiăng lăng glăi abih bang hơdôm tơlơi dŏ tơdu, aka ƀu rơguăt bruă, laih anun gơgrong gum ngă djŏp bruă. Bruă prăp rơmet kơ mông jơnum ngui thun 2028 kiăng ngă tañ, jao bruă rơđah rơđông, hơmâo mơnuih mă bruă djŏp, biă ñu amăng bruă pôr pơhing, pơƀuh gơnam tam:“Gir pơčrông sai, ba pơƀuh, pơtruh nao rai djŏp mơta gơnam, sa lĕ pơƀuh gơnam amăng glông sĭ mơdrô điện tử, samơ̆ ăt khŏm ngă mơn bruă ba pơƀuh hăng blơi gơnam tui hơđăp. Kâo rơkâo anom pơphun jơnum ngui, hơdôm sang bruă kơnuk kơna pơhmư̆ tơlơi pơgôp hiăp, pơčrông sai, rơkâo đĭ mơ̆ng hơdôm gơnong bruă, hăng hơdôm boh să, giong anun pơthâo brơi kơ Jơnum min mơnuih ƀôn sang tơring čar, laih anun ba tơbiă bruă kiăng ngă kơ mông jơnum ngui thun 2028”./.