Đĭ pơhiăp git gai mông jơnum, Khua khul git gai Ping gah ơi Trần Cẩm Tú lăng yôm hơdôm  tơlơi truh kih, boh than dưi ngă amăng djop mơta bruă mơ̆ Ping gah Anom bruă gơnong glông dưi ngă amăng rơwang ngă bruă rơgao, yôm hloh lĕ hơmâo git gai, črâo ba pơgiong klă pơphô bruă, djru brơi khul apăn bruă Ping gah, pơhlôm ƀơi anăp lĕ Ding jum kơđi čar, Khul git gai, Khua djru bruă Ping gah amăng bruă git gai ngă tui tơlơi pơtrun, tơlơi črâo trun mơng Ping gah, Jơlan hơdră bruă mă, pơsir hĭ lu bruă mơng Ping gah hăng hơdôm bruă phrâo ƀuh; gum hrŏm ngă bơkơnar bruă mă mơng hơdôm anom pơphô bruă mơng Ping gah; pơphô bruă hăng djru brơi klă jơnum tal 13, gir run prap lui Jơnum tal 14.

Ơi Trần Cẩm Tú rơkâo, Ping gah pơtrut tañ ƀiă dong bruă ngă tui pơplih yua boh thâo phrâo hăng pơplih hơdră ngă hră pơ-ar amăng anom bruă Ping gah, kơtưn mă yua boh thâo măi mok djru brơi kơ bruă git gai, laih dong pơhlôm hơgŏm tơlơi pơhing mơng Ping gah. Hrŏm hăng anun kiăng kơtưn pơjing Ping gah gum pơgôp, mut hrŏm, ngă bruă rơđah rơđông, hơđong kjăp djop mơta amăng bruă kơđi čar, tơlơi pơmĭn, pơphun bruă hăng pran hơdip; hrưn đĭ amăng bruă git gai, pran gơgrong amăng khul grup Ping gah.