5 thun rơgao, bruă mă bơkơtưn akŏ pơdong Anom bruă san gia jrao ling tơhan ngă tui 5 mơta bruă klă hơmâo pơjing rai bruă mă ngă hrom mơnuih ƀôn sang tong ten, lar lu amăng abih bang khul ling tơhan. Anom bruă ping gah, khua mua git gai tơhan djop gưl jai hrơi đing nao lu hloh amăng bruă wai lăng, pơgang suaih pral kơ ling tơhan hăng mơnuih ƀôn sang. Lu thun na nao, mrô ling tơhan găng añrăng, suaih pral, dưi pơgang djơ̆ lăp 98%. Tơlơi thâo hruaih amăng bruă mă hăng pran jua hiam mă bruă mơ̆ng khua mua, nai ia jrao, ling tơhan ngă bruă ia jrao dưi pơđĭ tui, djơ̆ hăng anŏ kiăng mơ̆ng anom bruă ia jrao ling tơhan, kjăp amăng bruă, rơgơi kơhnâo pơjrao duăm ruă, tơlơi pơmin kơđi čar dưi hơđong, ngă pơgiong bruă jao.

Nai ia jrao gah ling tơhan dêh čar hơmâo djru hrom bruă ia jrao ling tơhan  pơgang rơnuk rơnua sang gum hơbit djop dêh čar. Dơ̆ng mơ̆ng boh tơhnal dưi tŭ mă, Khua tơhan krên dên ơi Phan Văn Giang, Khua ding jum ling tơhan pơtrun hiăp, pơ anăp anai, djop sang bruă ia jrao gah ling tơhan pơtrut kơtang, pơđĭ kyar bơkơtưn mă bruă, kơsem min hơdôm mơta tơlơi phrâo hloh anom bruă ia jrao ling tơhan khom ngă ră anai, kiăng hơmâo hơdră pioh kơ nai ia jrao ling tơhan pơsir hmao kru amăng djop bruă mă, tơlơi hơmâo.