Kơ-iăng khua ding jum, ơi Phạm Ngọc Thưởng-Khua git gai gưl dêh čar kơ tal pơplông abih anih 12 thun 2023 pô git gai jơnum. Tal pơplông abih anih 12 thun anai hơmâo rơbêh 1 klăk čô čơđai sang hră čih anăn pơplông. Rơgao 2 hrơi pơplông hơmâo rơbêh 98,86% mrô mơnuih nao pơplông. Đơ đam dêh čar hơmâo 2.272 bit anih pơphun hăng 43.032 boh anih mut pơplông. Pơtong glăi klah čun blung a, bruă prăp lui pơplông pơphun tong ten klă hlom bom. Pơphun pơplông hăng dŏ ĕp lăng bruă mă pơphun pơplông ngă djơ̆ khut khăt tơlơi phiăn pơtrun.

Akŏ tơlơi tơña pơplông ăt amăng hơdră hrăm gưl klâo mơ̆n, ngă djơ̆ hăng tơlơi pơtô, hnong thâo hluh kơ hơdră či pơplông, kiăng pơsit puăng brơi kơ mơnuih pơplông abih anih 12 laih anun pơtong rơnoh prăk anun kiăng dăp brơi čih anăn hlơi kiăng mut hrăm gưl prong. Bruă mă pơgăn tơlơi soh ba yua măi mok boh thâo ia rơgơi plư pleč mông pơplông hơmâo lăi hlâo kom khut khăt, ƀu dưi djă telephôn mut amăng anih pơplông, samơ̆ sa, dua čô ăt ngă soh glăi, ăt dŏ hơmâo ƀing nai lăng pơplông ngă soh tơlơi phiăn pơkă. Rơđah biă ñu, hơmâo 41 čô arăng brơi pơdơi mơtam pơplông. Ƀơi mông jơnum lăi pơthâo, pơ kơ khua mua mơ̆ng Ding jum Pơtô hăng Pơjuăt ăt lăi glăi lu tơlơi tơña mơ̆ng ƀing čih tơlơi pơhing kơ bruă ngă soh ba tơbiă akŏ tơlơi pơplông gah rơngiao ƀơi tơring čar Cao Bằng, Yên Bái...