VOV4.Jarai - Amăng hơdôm hrơi rơgao, ƀơi ƀon prong Hồ Chí Minh hơmâo pơphun Jơnum pơplông mă pri pơtui jua pơhiăp dêh čar tal 15 thun 2022. Hăng anăn ñu “Pơplih hơdeč hmar - dưi găn rơgao tơnap tap, Jơnum pơplông pôr pơhing dêh čar ta tal anai lu anom bruă nao pơplông hloh (86 anom bruă) laih anun mrô tơlơi pơhing ba pơplông lu hloh kơ mơng hlâo, hăng rơbêh 500 tơlơi pơhing. Anai jing “hrơi jơnum ngui prong” mơng ƀing ngă bruă pôr pơhing, pơtui jua pơhiăp bang hyu kơtang biă amăng mơnuih tơpuôl.

Jơnum pơplông mă pri pơtui jua pơhiăp hơmâo pơphun 2 thun ha wơ̆t, kiăng ƀuh, pơpŭ kơ ƀing čih tơlơi pơhing, tơlơi pơhing rơgơi, yôm hloh mơng ƀing pôr pơhing amăng dêh čar. Jơnum pơplông pơtui jua pơhiăp dêh čar tal 15 thun 2022 hơmâo anăn lĕ “Pơplih hơdeč hmar - dưi găn rơgao tơnap tap”. Mơng rơbêh 500 tơlơi čih pơhing ba pơplông (lu hloh kơ mơng hlâo), Khul pơplông hơmâo ruah mă 203 tơlơi pơhing mut pơplông tal rơnuč ƀơi djŏp hơdră pôr pơhing, mơng phóng sự, hơduah tơña, pôr pơhing hăng tơlơi ră ruai ngă sen, pôr pơhiăp ƀơi anăp....Tơlơi pơplih phrâo mơng Jơnum pơplông tal anai lĕ Ƀing khua amăng khul pơplông hơmâo pơphun pơplông hăng brơi pri Đok pơhiăp mah, brơi pri boh thâo dăp hơdră tơlơi pơhing hăng tơlơi pôr pơhing mă yua boh thâo mrô...

Anai jing tal dua Jơnum pơplông hơmao pơphun ƀơi ƀon prong Hồ Chí Minh laih anun jing hrơi jơnum prong mơng ƀing ngă bruă pôr pơhing pơtui jua pơhiăp amăng dêh čar. Ơi Phan Văn Mãi, Khua Jơnum min mơnuih ƀon sang ƀon prong Hồ Chí Minh lăi, Jơnum anai ƀu kơnong jing bruă yôm, hmư̆ hing đôč ôh mơ̆ anai jing pran jua kiăng khăp mơng ƀing ngă bruă pơtui jua pơhiăp hăng ƀon prong Hồ Chí Minh, anih mơ̆ ha thun hlâo gơgrong bruă tơgut pơbung rong hăng klin prong Covid-19 aka ƀu phiah ƀuh djơ̆ ôh mơng đưm.

“Ƀing čih tơlơi pơhing hrŏm hăng ƀing ơi ia jrao, mơnuih djru ƀơi anih hơmâo klin, mơnuih ƀon sang dêh čar ta, gơyut gơyâo ƀơi jar kmar hơmâo nao ƀơi anih hơmâo klin kơtang hloh. Laih anun, yua hơmâo mơnuih nao tơl anih, dêh čar ta thâo hluh, thâo pap hloh, gum hrŏm hăng ƀon prong. Ƀon prong hơmâo hmư̆ tơlơi juh alum, pơtrut pơsur, gir hloh dong đah mơng dưi găn rơgao mông tơnap tap hloh. Amăng mông anun, ƀing ta ƀuh rơđah anŏ yôm mơng bruă pôr pơhing lơ̆m hơmâo ngă klă tơlơi gơgrong bruă mơng pô”.

Khua Anom bruă VOV ơi Đỗ Tiến Sỹ atông hơgor pơphun Jơnum pơplông mă pri.

Jơnum pơplông pri pơtui jua pơhiăp dêh čar ta tal 15 ƀơi ƀon prong Hồ Chí Minh sit nik jing “hrơi jơnum ngui” prong hloh mơng ƀing ngă bruă pôr pơhing, bang hyu djŏp amăng mơnuih tơpuôl. Amăng anun, jơlan hơdră Pơtui jua pơhiăp hơmâo lu mơnuih hmư̆ brô̆ wơ̆t hăng ƀing gŏp ngă bruă pôr pơhing lăp đing nao. Rơngiao kơ tơlơi pơhing phrâo hơmâo mơnuih ƀon sang pơđing hmư̆ lĕ ƀing tuai mơng anom bruă pơplông ăt ba nao pơ anih pơplông lu tơlơi ngă glưh pran jua. Anun lĕ tơlơi ră ruai djru mơnuih bưp tơlơi truh adai ƀu lăp ngă, tơlơi truh apui ƀong. Tơlơi ră ruai “ƀu dưi rơbuh” mơng Hoàng Thị Mũ hăng tơlơi khăp ƀu-eng, thâo čơđôm ba mơng ƀing nai pơtô gah kual čư̆ siăng kriang pơtâo, tơlơi ră ruai sit mơng tơhan pơgang apui ƀong hơmâo pioh glăi tơlơi lăp hơdor biă mă hăng pô hmư̆, pô lăng. Ƀu hơmâo lăng hyu mơnuih ieo gah, ia mơta jruh, ol kơdol amăng pran jua. Ayong Nguyễn Huy Hoàng, pô hyu mă tơlơi pơhing Glông pơtui jua pơhiăp bruă nao rai ƀơi jơlan ƀon prong Hồ Chí Minh lăi:

“Mơng bruă jơnum pơplông pơtui jua pơhiăp, hơdôm tơlơi ră ruai kah hăng mơng trung tá Thành, mơng adơi Mũ ngă kơ pô kâo hơmâo thâo djŏp mơta tơlơi, ƀu kơnong gah bruă mă đôč ôh, ta thâo hluh gah tơlơi khăp kiăng ană mơnuih, čang rơmang anai jing pran pơtrut đĭ ngă bang hyu hloh tơlơi klă hiam, kiăng ƀing hyu mă tơlơi pơhing phrâo tui hăng kâo anai ba nao tơlơi ruă ruai mơ-ak hăng pô hmư̆”.

Khua git gai ƀon prong HCM ơi Nguyễn Văn Nên hăng Khua VOV ơi Đỗ Tiến Sỹ brơi bơnga kơ ƀing khua čŏm puang.

Ơi Nguyễn Trọng Nghĩa, Khua apăn bruă Ping gah dêh čar, Khua anom pơtô bruă Ping gah dêh čar lăi, jơnum pơplông hơmâo pơphun amăng hrơi mông Ping gah, mơnuih ƀon sang hăng abih bang tơhan glăk bơkơtưn ngă truh kih Tơlơi pơtrun Jơnum ping gah tal 13; ha pran jua ngă tui hơdôm jơlan hơdră, tơlơi pơtrun mơng Ping gah hăng Kơnuk kơna đah mơng rŭ glăi hăng pơđĭ kyar tơlơi bơwih ƀong, hơmâo tơlơi bơkơtưn nao rai mơng djŏp hơdră pôr tơlơi pơhing. Yua hnun, Gong phun jua pơhiăp Việt Nam hăng anom bruă pôr pơhing Việt Nam kiăng pơplih tơlơi pơmin, hyu ĕp, pơčeh phrâo hơdră ngă bruă đah mơng pơplih hơdeč, dưi ngă bruă amăng rơnuk phrâo. Bruă pôr pơhing pơtui jua pơhiăp Việt Nam kiăng jing glông pôr pơhing lăi glăi tơlơi hơmâo amăng mơnuih mơnam, kiăng akŏ pơjing hơdră ngă bruă lăp djơ̆, dưi mă yua, djru ngă hơđong kơjăp bruă čar, mơnuih mơnam hăng pơđĭ kyar lŏn ia, pok prong tơlơi dưi mơnuih ƀon sang, pơđĭ tui tơlơi rơgơi git gai mơng Ping gah, wai lăng mơng Kơnuk kơna hăng mơnuih mơnam. Ơi Nguyễn Trọng Nghiã lăi:

“Rim čô mơnuih pôr pơhiăp kiăng pơtrut tui hloh pran jua hrăm mă pô, kơjăp tơlơi pơmin bruă čar, kơjăp tơlơi pơmin amăng bruă mă; hrăm tui dong kiăng apăn bruă mă tơlơi pơhing, hơmâo tơlơi pơmin mă hơjăn, dưi lăi glăi djŏp tơlơi hơmâo. Rim čô mơnuih čih tơlơi pơhing kiăng čih dlăm, djơ̆ hăng tơlơi hơdip, lăi glăi rơđah tơlơi hơdip mơda, mut hrŏm hăng mơnuih tơpuôl, hơdip amăng pran jua ană plơi pla, tui anun kah mơng dưi čih tơlơi pơhing yôm, hơmâo tơlơi pơmin klă, hơmâo tơlơi khăp pap, djơ̆ hăng tơlơi hơmâo sit laih anun yua kơ tơlơi klă hiam mơng dêh čar, mơng djuai ania ta”.

Hơdôm hrơi pơphun Jơnum pơplông pơtui jua pơhiăp dêh čar tal 15 ƀơi ƀon prong Hồ Chí Minh, rơngiao kơ bruă pôr pơhing, ăt hơmâo mơn mông jơnum pioh kơ mơnuih ngă bruă pơtui jua pơhiăp Việt Nam pơbưp, lăi pơthâo nao rai tơlơi klă hiam. Anun lĕ bruă pơdă prưng “Hơdôm boh tơhnal pơđĭ kyar mơng ƀon prong Hồ Chí Minh”, jơnum jar kmar “Pơđĭ prăk pơhrui kơ hơdôm Gong phun pơtui jua pơhiăp pơdah rup amăng rơnuk pơplih yua mrô”, jơnum boh thâo kĭ thuâ̆t “Tơlơi lông mơng bruă pơtui jua pơhiăp amăng rơnuk mă yua mrô”, jơnum “Pơkra jơlan hơdră pôr pơhing kiăng pơdơi pơdă amăng hrơi mông hơmâo tơlơi ngui ngor pơdơi pơdă mơ-ak amăng plang internet”. Anun sit nik jing “hrơi ngui ngor” prong mơng ƀing ngă bruă pôr pơhing, hơmâo pơdah pơƀuh akŏ bruă “Pơplih hơdeč - dưi găn rơgao tơnap tap”.

VOV: Čih - Siu H’Mai: Pơblang