VOV4.Jarai-Hrơi anai, lơ 14/2, ƀơi Hà Nội, Ding jum Bruă hmua hăng pơđĭ kyar plơi pla ngă hrom Jơnum min mơnuih ƀôn sang Việt Nam dŏ pơ dêh čar tač rơngiao jơnum bơkơtuai pơtruh brơi mơnuih mơnuih ƀôn sang dŏ pơ dêh čar tač rơngiao ngă bruă sĭ mơdrô, pơtrut tuh pơ alin kơ bruă ngă hmua hăng sĭ mơdrô. Boh tơhnal kiăng pôr pơthâo, pơtruh brơi bruă tuh pơ alin hăng sĭ mơdrô gơnam đang hmua, kơtưn mut phung jar kmar gah anom bruă ngă hmua ƀơi dêh čar.

Jơnum anai lăi pơthâo hăng mơnuih ƀôn sang dŏ pơ tač rơngiao anăp nao kơ bruă pơhưč tuh pơ alin hăng ngă hrom amăng bruă ngă hmua pla pơjing, wai lăng kyâo glai, bruă mă akan hơdang ăt kah hăng tơlơi gêh găl pơkra ming gơnam sĭ mơdrô anăn OCOP. Mông jơnum anai yơh, pơđing hmư̆, tơlơi pơgôp hiăp, anŏ kiăng mơ̆ng ƀing thâo hră, mơnuih rơgơi kơhnâo mơ̆ng mơnuih ƀôn sang dŏ pơ tač rơngiao djru pơtrut sĭ mơdrô, ngă gêh găl kơ mơnuih ƀôn sang dŏ pơ tač rơngiao glăi tuh pơ alin, sĭ mơdrô, ngă hrom anom bruă sĭ mơdrô amăng dêh čar, mơnuih ngă hmua hăng djop sang bruă ngă ƀong hrom amăng dêh čar, mơ̆ng anun, akŏ pơjing khul ngă hrom tơlơi pơhing pơtruh nao rai hăng mơnuih ƀôn sang dŏ pơ tač rơngiao blơi gơnam sĭ mơdrô hăng tuh pơ alin kơ bruă ngă hmua amăng dêh čar ta pô.

Nay Jek: pơblang