VOV4.Jarai - Dêh čar Việt Nam kiăng lăi nao tơlơi lăng nao pơ anăp hăng tơlơi thâo rơgơi mơng jar kmar amăng bruă hơkrŭ glăi tơlơi bơwih ƀong huă - mơnuih mơnam mơtah, hơđong kơjăp hăng abih bang bruă, pơtrut tŭ yua Jơlan hơdră hơkrŭ glăi hăng pơđĭ kyar bơwih ƀong huă mơnuih mơnam tơdơi kơ klin Covid-19 hơđuh đĭ. Anai lĕ tơlơi pơsit mơng Kơ-iăng khua dêh čar ơi Phạm Bình Minh ƀơi mông Jơnum jar kmar “Pơtrut hơkrŭ glăi Tơlơi bơwih ƀong Mơtah hăng Abih bang: Tơlơi rơgơi kơđiăng lui mơng jar kmar” yua jơlan hơdră Pơđĭ kyar Sang gum hơbit djŏp dêh čar (UNDP) hăng Ding jum pơtom hiăp ngă hrŏm pơphun ngă, pơphun mơguah lơ 25/2 ƀơi Hà Nội, bơbưp ƀơi anăp hăng lăng mơng ataih amăng tivi. Pơhiăp pok pơphun mông jơnum, Kơ-iăng khua dêh čar ơi Phạm Bình Minh pơsit: mơng tơlơi thâo kơđiăng lui bruă pơplih phrâo, pok bah amăng hăng mut hrŏm jar kmar amăng rơbêh 35 thun rơgao, rim hơyak rơbat pơplih phrâo mơng Việt Nam lêng tơbiă mơng pơplih tơlơi pơmin, tơlơi thâo hluh, anăp nao tơlơi klă hiam pơđĭ kyar sui thun, pơƀut abih bang mơng lŏn ia, mơng mơnuih ƀon sang. Laih anun mông jơnum hrơi anai jing tơlơi gêh gal kiăng Việt Nam pơhmư̆ tơlơi lăi pơthâo, pơtô brơi mơng ƀing kơhnâo, hơdôm anom bruă jar kmar, ƀing apăn bruă kơsem min amăng dêh čar ta hăng čar rơngiao, kơ tơlơi lăng nao pơ anăp, tơlơi thâo rơgơi kơđiăng lui mơng jar kmar amăng bruă hơkrŭ bơwih ƀong mơnuih mơnam mơtah, hơđong, hăng abih bang bruă.

Siu H’Mai: Pơblang