Nao jơnum hrŏm pơphun mơ̆ng lơ 5-8/8 lĕ hơmâo 188 čô pơ ala kơ gưl čơđai muai mơ̆ng lu kual, lu tơring amăng dêh čar. Ƀing čơđai anun jing ƀing hur har ba gru hlâo, arăng ruah mă mơ̆ng 43 boh tơring čar, ƀôn prong, anom bruă, pơ ala kơ 25 klăk čô čơđai muai amăng đơ đam dêh čar nao jơnum. Ƀơi mông jơnum bruă čơđai muai gưl dêh čar tal anai, ƀing čơđai muai amra bưp nao rai, bơ ră ruai hăng pơdah thâo tơlơi pơmin, anŏ kiăng mơ̆ng pô, anih dŏ, sang hră hrăm laih anun mơ-it hăng khua mua tơlơi ta pô kiăng, hơdôm tơlơi čang rơmang pơdjơ̆ nao kơ čơđai muai.

5 khul bruă ƀing čơđai pơčrong sai, pơdah thâo tơlơi kiăng hăng rơkâo kơ mơnuih pơprong, ƀing tha djru ba kah hăng : Ngă hrŏm pơgăn tơlơi taih amang, ngă sat kơ čơđai muai; Ngă hrŏm, pơhlôm hăng pơgang tơlơi truh sat ruă nuă, rơka rơkač, tơlơi truh ƀlung ia, rơdêh jrŏm djơ̆ čơđai muai; Ngă hrŏm pơhlôm, pơgang ba čơđai muai tơlơi pơhŭi mơ̆ng plăng internet; Ngă hrŏm pơhlôm, pơgang anŏ pơblih ayuh hyiăng, klin kheng duăm ruă, tơlơi truh lŏn adai ngă; Ngă hrŏm pơhlôm pơgang bruă pơgô̆ čơđai mă bruă apah ƀu djơ̆ hăng tơlơi phiăn hăng lu tơlơi pơkŏn mơ̆ ƀing čơđai muai đing nao.