VOV4.Jarai - Mơguah lơ 14/7, ƀơi Ƀirô Kơnuk kơna, Khua dêh čar ơi Phạm Minh Chính git gai Jơnum tal 3 Khul git gai dêh čar pok pơhai ngă tui tơlơi ƀuăn mơng Việt Nam amăng Jơnum COP26. Đĭ pơhiăp amăng mông jơnum, Khua dêh čar ơi Phạm Minh Chính rơkâo Khul git gai ngă tui klă hơdôm bruă jao hơmâo ba tơbiă, pơsir hĭ tơnap tap, hơdôm hơdră bruă, tơlơi phiăn ngă gêh gal kiăng ngă tui tơlơi ƀuăn mơng Việt Nam amăng Jơnum COP26.

Khua dêh čar ăt rơkâo ƀing khua mua pơčrông sai đing nao bruă akŏ phun, anun lĕ ba tơbiă hơdră bruă, djop ding jum, gơnang bruă hluai tui bruă jao kiăng pơphun ngă tui. Djop ƀon lan ăt thâo rơđah hăng pơphun pok pơhai, hruă kjăp tui hơdôm tơlơi ƀuăn mơng Jơnum COP26, sit biă ñu hơdôm hơnong pơkă hrŏ trun ngă hơƀak jrăk amăng thun 2050 lơ̆m ngă tui hơdôm hră pơ-ar tui tơlơi phiăn, hră pơ-ar črâo ba mơng gơnong glông.

Siu Đoan: Pơblang