VOV4.Jarai - Tlam lơ 4/4, Jơnum tui tơđar blan 3 mơng kơnuk kơna ăt lăi nao bruă čih pơkra tơlơi phiăn mơn. Kơnuk kơna hơmâo pơhmư̆, bơkơtuai tơlơi rơkâo čih pơkra Tơlơi phiăn wai lăng, mă yua prăk kơnuk kơna tuh pơ plai pơkra gơnam, sĭ mơdrô ƀơi anom bơwih ƀong (pơplih pơkra); rơkâo kiăng čih pơkra Tơlơi phiăn pơđĭ kyar pơkra măi mok; Tơlơi phiăn Khăm pơjrao tơlơi ruă; lăi pơthâo glăi tơlơi pơkôl pơkă mrô lŏn hơmâo mă yua tui rim thun hăng kual pơkra gơnam hăng măi mok prong rơbêh 500 ektar amăng Tơlơi pơtrun wai lăng kual pơkra gơnam hăng măi mok laih anun kual bơwih ƀong. Bơkơtuai kơ bruă čih pơkra tơlơi phiăn, ding kơna Kơnuk kơna ngă rơđah kiăng khŏm hơmâo kơčăo bruă, tơlơi rơkâo čih pơkra Tơlơi phiăn anai; hơdôm tơlơi aka ƀu djơ̆ ngă gun kiăng pơsir; anŏ lăp djơ̆, pơtruh nao rai mơng djŏp tơlơi phiăn....kiăo tui tơlơi pơmin tơlơi phiăn ƀu kơnong či wai lăng đôč ôh mơ̆ anai lĕ tơlơi gêh gal či bơwih brơi, pơtrut đĭ kyar. Klah čun kơ bruă čih pơkra tơlơi phiăn, Khua dêh čar tŭ ư laih hăng hơdôm kơčăo bruă tơlơi phiăn hăng tơlơi pơgôp hiăp mơng khua mua amăng Kơnuk kơna. Khua dêh čar jao kơ hơdôm ding jum, anom bruă bơdjơ̆ nao git gai, ngă hrŏm pơhmư̆ tui, ngă pơgiong hĭ đah mơng pơƀuh kơ Khua mua git gai pơ ala mơnuih ƀon sang sem lăng.

Siu H’Mai: Pơblang