Tui hăng tơlơi lăi pơthâo, thun 2024, Kơnuk kơna, Khua dêh čar kiăo tui djơ̆ hăng Tơlơi pơtrun, tơlơi pơsit mơ̆ng Ping gah, mơ̆ng Khua mua pơ ala mơnuih ƀôn sang dêh čar či git gai črâo bruă, git gai djơ̆ glông, anun jing tơlơi bơwih ƀong huă - mơnuih mơnam dêh čar ta hơkrŭ glăi tañ biă; hơmâo lu boh than hmư̆ hing amăng djŏp mơta bruă laih anun klă hloh kơ thun 2023. Pơhiăp ƀơi mông Jơnum, Khua dêh čar ơi Phạm Minh Chính lăi, mông Jơnum pơ-ư pơ-ang biă mă hơmâo Khua git gai Ping gah ơi Tô Lâm nao pơhmư̆ hăng git gai.

Tơlơi git gai yôm biă mă, pơdah abih pran jua, pơhiăp dlăm, pơhiăp bang hyu djŏp bruă mơ̆ng Khua git gai Ping gah jing pơtrut pran jua prong biă mă laih anun jing pơčrâo brơi jơlan ngă bruă truh pơ anăp anai kơ Kơnuk kơna ta, djŏp gưl, anom bruă, tơring tơrang ngă tui bruă mă thun 2025 wơ̆t hăng hrơi mông pơ anăp. Tơlơi akŏ phun amăng thun 2025 anai lĕ “Ngă djơ̆ tơlơi phiăn, gơgrong bruă, ngă hơdeč hmar; tŭ yua; yak hmar hơmâo tơlơi pơplih prong”, Kơnuk kơna, Khua dêh čar pơƀut git gai ngă tui djŏp tơlơi pơtrun, tơlơi pơsit mơ̆ng Ping gah hăng Khua mua pơ ala mơnuih ƀôn sang, pơƀut lăi nao 3 mơta hơdră ngă bruă, 6 bruă mă yôm phun, 12 hơdră pơsir hăng 185 bruă mă rơđah rơđông.