Khua dêh čar ơi Phạm Minh Chính lăng yom bruă ngă hrŏm, djru ba mơ̆ng dêh čar Nga pioh kơ Việt Nam amăng bruă pơtô hrăm mơnuih rơgơi kơhnâo, mơnuih kơhnăk amăng bruă mă gah apui ayuh gas; pơkă lăng ming pơkra, ba yua sang bruă apui ayuh gas ƀơi Đà Lạt; pơđĭ kyar bruă man pơdong sang apui ayuh gas Việt-Nga; djru ia jrao phóng xạ pioh pơkă lăng hăng pơjrao tơlơi ruă bơbrah hăng brŭ asar, juăt lăi  ung thư.

Khua dêh čar čang rơmang dêh čar Nga hăng Group Rosatom ăt gum ngă hrŏm hăng Việt Nam, ƀu kơnong pơđĭ kyar apui yua hăng ayuh gas đôč ôh, dŏ djru pơtô baboh thâo ia rơgơi gah bruă ayuh gas pioh ba yua kơ bruă rơnuk rơnua, bơwih ƀong huă mơnuih mơnam. Khua anom bruă Rosatom, ơi Alexey Likhachev brơi thâo, Rosatom ăt amra ngă hrŏm, djru Việt Nam man pơdong sang măi apui yua ayuh gas; man pơdong sang bruă ayuh gas phrâo rơgơi hloh; jao glăi boh thâo ia rơgơi pioh ba yua; kiăng pơhrăm mơnuih mă bruă amăng dêh čar Việt Nam pô soh.